Rəşad Sadiqov: Qəbələ bu mövsüm daha keyfiyyətli oyun sərgiləyir
"Qəbələ"nin kapitanı Rəşad Sadiqov Avropa Liqasının ikinci təsnifat mərhələsi çərçivəsində Macarıstan MTK-sı üzərindəki qələbədən (2:0, ilk oyun 2:1) sonra azerisport.az saytının suallarını cavablandırıb:
- Macarlarla Bakıdakı görüşü necə şərh edərdiniz?
- Çətin oyun oldu. Rəqib pis komanda deyildi. Amma biz onlardan daha təcrübəliydik. İkinci hissədə daha çox qol vura bilərdik. İstənilən halda mərhələ adladığımız üçün şadam.
- Siz özünüz də qol vurmağa yaxın oldunuz...
- Qol vurmağı çox istəyirdim. Mənə rekordçu olmaq üçün cəmi bir qol lazımdır. Əslində, avrokuboklarda 8 qol vurmuşam, amma UEFA onlardan birini saymayıb.
- "Qəbələ" fasilədən sonra niyə tempi aşağı saldı?
- Sadəcə, sakit oynamağa qərar verdik. Nəticə artıq xeyrimizə olduğuna görə, topu özümüzdə saxlamağa çalışırdıq. Özümüzü çox da yormağa ehtiyac qalmamışdı.
- Növbəti rəqib Fransanın "Lill" klubudur...
- Fikrimcə, bu komanda barədə əlavə nəsə danışmağa ehtiyac yoxdur. "Lill"i onsuz da hər kəs yaxşı tanıyır. Amma biz hələ rəqibi analiz etməmişik.
- Rəqibin adlı-sanlı olması psixoloji baxımdan problem yaratmayacaq?
- Belə rəqiblərlə oyunlarda əlavə motivasiyaya ehtiyac olmur. Ona görə də "Lill" adının özü bizim üçün motivasiyadır.
- Bu komandanı keçməyiniz realdır?
- Mərhələ adlamaq istəyirik. Amma yalnız istəklə uğur qazanmaq olmur. Bunun üçün mübarizə aparmaq lazımdır. Eyni zamanda taktiki, fiziki, texniki baxımdan da tam hazır olmaq lazımdır. "Qəbələ" bu mövsüm daha keyfiyyətli futbol sərgiləyir. Amma "Lill" də ötən il keçdiyimiz "Apollon", "Panatinaikos" deyil. Fransa klubu daha güclü, ciddi rəqibdir. İstənilən halda öz gücümüzə inanırıq.