Nika Kvekveskiri: 5:1 baş məşqçimizin düzgün taktikasının nəticəsi idi
"Qəbələ"nin yarımmüdafiəçisi Nika Kvekveskiri Avropa Liqasının birinci təsnifat mərhələsi çərçivəsində Gürcüstan "Samtredia"sı üzərində qazandıqları qələbəni şərh edib. Azerisport.az saytına açıqlamasında o, 5:1 hesablı qələbə ilə bağlı bunları söyləyib:
"Əlbəttə, hesab bizim üçün gözlənilməz oldu. Amma bu görüşə çox ciddi hazırlaşmışdıq. Rəqibin zəif olduğu barədə qətiyyən düşünməmişdik. Sadəcə, hesabın belə alınması bütün futbolçularımızın meydanda var gücünü qoymasının nəticəsidir".
"Komandamız bu oyunda çox yaxşı futbol sərgilədi. "Samtredia" isə özünü göstərə bilmədi. Hər iki komanda qələbə qazanmaq istəyirdi. "Samtredia"nın heyətində gənc futbolçular vardı. Hansı ki, onlar ilk dəfə avrokubok matçına çıxmışdılar. Onlar özlərini göstərmək, nəyə qadir olduqlarını isbatlamaq istəyirdilər. Amma "Qəbələ" rəqibindən daha təcrübəli olduğunu göstərdi. Həm də baş məşqçimiz taktiki cəhətdən düzgün oyun qurmuşdu. Hər şey plan üzrə alındı".
Onun sözlərinə görə, hələ növbəti mərhələyə çıxmağı bayram etmək olmaz: "Hələ cütün taleyi tam həll olunmayıb. Çünki ev oyununda qol buraxdıq. Odur ki, arxayınlaşmamalıyıq. Gürcüstandakı oyuna da ciddi hazırlaşmalıyıq. Cavab oyununa da yaxşı köklənib, qələbə qazanmağa çalışacağıq".
