Daçiya qalmaqallı məsələ ilə bağlı üzr istədi
Avropa Liqasının birinci təsnifat mərhələsi çərçivəsində bu gün Bakıda "Kəpəz"in qonağı olacaq Moldovanın "Daçiya" klubu ötən gün komandanın "Dalğa Arena"dakı son məşqi ilə bağlı rəsmi saytında yerləşdirilən materialdakı kobud səhvlə bağlı üzr istəyib. Azerisport.az xəbər verir ki, Moldova təmsilçisinin saytında arenanın yerləşdiyi Mərdəkanın adının erməni əsilli olduğu iddia edilmişdi.
Bu isə "Kəpəz"in ciddi etirazına səbəb olmuş və Gəncə klubunu narazılığını qarşı tərəfin diqqətinə çatdırmışdı.
Artıq "Daçiya" rəsmi saytı vasitəsilə bu məsələyə görə üzr istəyib. Klubun rəsmi mövqeyi ilə yanaşı, prezident Aldan Şişxanov da kobud səhvə görə Azərbaycan xalqından, "Kəpəz" azarkeşlərindən üzr istəyib. Onlar bunun heç bir təxribat xarakteri daşımadığını, sadəcə, klubun mətbuat xidmətinin əməkdaşlarının səhvi olduğunu diqqətə çatdırıblar və ümid etdiklərini vurğulayıblar ki, bu qalmaqal iki ölkə arasındakı münasibətlərə heç bir təsir göstərməyəcək.
