Qəbələ Samtredia ilə oyunun hazırlığını davam etdirir
“Qəbələ” UEFA Avropa Liqasının birinci təsnifat mərhələsinin “Samtredia” (Gürcüstan) ilə ilk oyununun Bakıdakı hazırlıqlarına start verib. Azerisport.az xəbər verir ki, iyunun 26-da Gürcüstan toplanışını başa vurub, Bakıya qayıdan “qırmızı-qaralar” bu gün növbəti məşqinə çıxıb.
Məşqlərinə ara verməyən Roman Qriqorçukun yetirmələrinin günün ilk yarısına təsadüf edən hazırlığı paytaxtda baş tutub. ADBTİA stadionundakı çalışmalarda futbolçular bərpaedici hazırlıq keçib. Komanda növbəti məşqini sabah günün ikinci yarısında keçirəcək.
Xatırladaq ki, “Qəbələ” 2016-2017-ci illər mövsümünə iyunun 30-da start verəcək. “Qırmızı-qaralar” UEFA Avropa Liqasının birinci təsnifat mərhələsinin ilk oyununu 8-ci km stadionunda keçirəcək. Komandamız Gürcüstan çempionatının gümüş mükafatçısı “Samtredia” ilə üz-üzə gələcək. Bu, 2014-2015 və 2015-2016-cı illər mövsümlərində də UEFA Avropa Liqasında çıxış edən “Qəbələ”nin avrokuboklarda ardıcıl 3-cü mövsümünün startı olacaq.
UEFA Avropa Liqası
Birinci təsnifat mərhələsi
İlk oyun
30 iyun
21:00. “Qəbələ” - “Samtredia”
Baş hakim: Denis Şerbakov (Belarus).
Baş hakimin köməkçiləri: Dmitri Juk, Yuri Xomçanka (hər ikisi Belarus).
Dördüncü hakim: Sergey Tsinkeviç (Belarus).
Hakim-inspektor: Aleksey Spirin (Rusiya).
Bakı. 8-ci km stadionu.