Şəhriyar Əliyev: Kəpəzin azarkeş dəstəyinə ehtiyacı var
"Kəpəz"in müdafiəçisi Şəhriyar Əliyevin azerisport.az saytına müsahibəsi
- Avropa Liqasının birinci təsnifat mərhələsi çərçivəsində qarşılaşacağınız Moldova "Daçiya"sı ilə ilk oyun öncəsi son sınaq matçınızda "Bakı"ya 6 cavabsız qolla qalib gəldiniz...
- Bu, yoxlama oyunu idi. Qələbə qazanmaq, komandada özünəinamı artırmaq lazım idi. Ona görə də ələ düşən bütün qol şanslarından yararlanmağa çalışdıq.
- Türkiyə toplanışından nə dərəcədə razı qaldınız?
- Toplanış çox yaxşı keçdi. Əsas odur ki, hər şey bizim istədiyimiz kimi idi. Yoxlama oyunları keçirdik, məşqçilərin tələblərini yerinə yetirməyə çalışdıq. Bu tələbləri nə dərəcədə yaxşı yerinə yetirdiyimizi isə yalnız baş məşqçi söyləyə bilər. Vaxtımız az olsa da, bundan maksimum yararlanmağa çalışdıq.
- Cəmi üç gün sonra sizi "Daçiya" ilə ilk oyun gözləyir. Bu görüşə hazırsınız?
- UEFA-nın qərarı bizim üçün yaxşı olmadı. Bakının isti havasına qısa müddətdə uyğunlaşmaq asan deyil. Ümid edirəm ki, oyun zamanı heç bir çətinlik çəkmərik.
- "Kəpəz" fanatları "Dalğa Arena"nı tam doldura biləcək?
- Azarkeşlərimiz ümidliyik. Onlar bizi bütün mövsüm ərzində dəstəkləyiblər. İnanıram ki, "Daçiya" ilə oyunda da belə olacaq. Onların dəstəyinə ehtiyacımız var.
- Püşkün nəticəsini özünüz üçün necə dəyərləndirərdiniz?
- Bizə zəif rəqib düşdüyünü deməzdim. Amma meydana çıxıb, öz oyunumuzu sərgiləyəcəyik. Hələ ki, rəqib barədə az məlumatımız var. Lakin bilirəm ki, onlar son mövsümdə çempionluğa oynayıblar və çox az qol buraxıblar.
- Moldova klubundan ehtiyatlanırsınız?
- Oyuna ciddi yanaşırıq. Avropa Liqasında asan oyun ola bilməz.
- "Qarabağ"ın futbolçusu olsanız da, "Kəpəz"də icarə əsasında çıxış edirsiniz. Niyə Ağdam klubuna qayıtmaq istəmədiniz? Ya istəmədilər?
- "Qarabağ"la daha bir illik müqaviləm var. Rəqabətdən qorxmuram. Sadəcə, "Kəpəz"də daha çox oynayıram, ona görə də buradayam. Oyun təcrübəmin çox olması mənə daha çox xoşdur.
- "Qarabağ"ın Lüksemburq "Düdelanj"ı ilə oyunlardakı şansları barədə nə düşünürsünüz?
- Rəqibi zəif komanda saymaq olmaz. Ümid edirəm ki, "Qarabağ" bu komandaya qalib gələcək.