Emin İmaməliyev: İnanıram ki, ilk dəfə dörd klubumuzun hamısı mərhələ adlayacaq
Azərbaycan yığmasının sabiq yarımmüdafiəçisi Emin İmaməliyevin azerisport.az saytına müsahibəsi
- Avrokubokların püşkünü klublarımız üçün nə dərəcədə düşərli hesab edirsiniz?
- Uğurlu saymaq olar. Dörd klubumuzun hamısı növbəti mərhələyə adlaya bilər. Belə şans indiyə kimi ələ düşməmişdi. Futbolumuzun indiki durumunu nəzərə alsaq, dörd klubumuzun hamısının mərhələ adlaması çox əla olardı. İnanıram ki, ilk dəfə belə bir uğura imza atacağıq və dörd klubumuzun hamısı mərhələ adlayacaq.
- Klublarımızdan hansının şansı daha az görünür?
- İndi bu barədə nəsə söyləmək çətindir. Komandaların heyətində dəyişiklik olub. Xüsusilə də "Neftçi"də, "Qəbələ"də, "Kəpəz"də. Onların ilk oyunlarında necə təsir bağışlayacağına baxmaq lazımdır. Amma bütövlükdə, bütün rəqiblər klublarımızın dişinə görədir.
- Sizə elə gəlmir ki, "Qəbələ" son mövsümlə müqayisədə indi zəifləyib?
- Əslində, Gürcüstandakı yoxlama oyunlarında Roman Qriqorçukun komandası çox yaxşı təsir bağışlayır. "Samtredia" ilə rəsmi oyunun necə olacağını gözləmək lazımdır. Əvvəllər Gürcüstan klubunu avrokuboklarda görməmişəm. Amma Gürcüstan təmsilçisidir, bunun özü hər şeyi deyir. Əminəm ki, bütün gürcü klubları kimi, "Samtredia" da əla texnikaya malik futbolçulardan təşkil olunub. Ötən mövsüm "Qəbələ" Tiflis "Dinamo"sunu keçəndən sonra böyük uğurlar qazandı. Bu dəfə də gürcüləri mübarizədən kənarlaşdırsalar, uğurlu davamı olacaq.
- Təmsilçilərimizdən ən az "Kəpəz"in bəxtinin gətirdiyi iddia olunur...
- "Daçiya" zəif komanda deyil. Amma püşkün nəticəsi ondan da pis ola bilərdi. Gəncə uzun müddətdir avrokuboklarsız qalmışdı. Ümid edirəm ki, "Kəpəz"in qitə səhnəsinə qayıdışı uğurlu olacaq.
- Amma Moldova klubları ilə oyunlar təmsilçilərimiz üçün əksər vaxt uğursuz alınıb...
- Elədir. Üstəlik, "Kəpəz"in avrokubok təcrübəsi də azdır. Amma ümid edirəm ki, bu, uğur qazanmaq üçün problem yaratmayacaq. Azərbaycan klubları son illərdə az uğur qazanmayıblar. Niyə də "Kəpəz" onu təkrarlamasın?
- "Neftçi"nin Malta "Baltsan"ı ilə oyundakı şansları barədə nə düşünürsünüz?
- Bakılılar rəqibi düzgün qiymətləndirməsələr, problem olacaq. "Neftçi" cütün favoritidir. Amma bu, sadəcə, oyun başlayana qədər elə olur. Yarı güclə indi Malta klubunu da keçmək mümkün deyil. Ona görə də tam güclərini sərf etməlidirlər.
- "Qarabağ"ın Lüksemburq "Düdelanj"ı ilə oyunlarda problem yaşamayacağına yəqin ki, əminsiniz...
- Ağdam klubu mərhələ adlamağa borcludur. Onlar indi elə bir səviyyəyə yüksəliblər ki, tələblər də artıb. "Düdelanj"ı asanlıqla keçmək olar. Amma bu, məsuliyyət hissini azaltmamalıdır. Bu komandadan yeni mövsümdə Çempionlar Liqasının qrup mərhələsinə vəsiqə qazanmaq gözlənilir.
