Giya Çeçadze: Samtredia qrup mərhələsinə çıxmaq planları cızmır
Gürcüstanın "Samtredia" klubunun baş məşqçisi Giya Çeçadze Avropa Liqasının birinci təsnifat mərhələsində qarşılaşacaqları "Qəbələ" ilə oyun öncəsi fikirlərini bölüşüb. Azerisport.az xəbər verir ki, o, ölkəsinin mətbuatına açıqlamasında öncə bunları söyləyib:
"Qəbələ" barədə hələ ki, az məlumatımız var. Amma onların ötən mövsüm Avroliqanın qrup mərhələsində çıxış etdiyindən xəbərimiz var. Azərbaycan çempionatında üçüncü olublar. Fikrimcə, şanslar bərabərdir. Ona görə də növbəti mərhələyə vəsiqə qazanmaq üçün əlimizdən gələni edəcəyik".
"Qəbələ" orta səviyyəli komandadır. Nə çox güclü, nə də çox zəif komanda deyil. Əlbəttə, "Qəbələ"dən zəif iki komanda ilə düşə bilərdik. Amma indi bütün komandalar futbol oynamağı bacarırlar, sonadək mübarizə aparırlar. Odur ki, bizə normal rəqibin düşdüyünü düşünürəm".
Baş məşqçi bir müddət öncə Albaniya "Kukesi"sinə qarşı keçirdikləri yoxlama oyunundan (4:0) da danışıb: "Həmin görüşdən razı qaldım. Amma "Qəbələ" ilə oyunda da belə uğurlu çıxış edib-etməyəcəyimizi deməkdə çətinlik çəkirəm. Azərbaycan klubu ilə oyuna qədər transferlərimiz olmayacaq və əlimizdəki heyətlə mübarizə aparmalı olacağıq".
"Samtredia"nın çalışdırıcısı planlarını da açıqlayıb: "Etiraf edim ki, biz qrup mərhələsinə çıxmağın planlarını qurmuruq. Çünki bu heyət cəmi bir ildir formalaşıb. Amma hər oyunda özümüzü yaxşı tərəfdən göstərməyə, azarkeşlərimizi sevindirməyə çalışacağıq".
(Worldsport.ge)