Rəşad Əzizli: Sloveniya ilə oyunda hakimlər bizi çox sıxdılar
Azərbaycanın gənclərdən ibarət yığma komandasının qapıçısı Rəşad Əzizlinin azerisport.az saytına müsahibəsi
- Sloveniya toplanışı necə gedir?
- Hər şeydən razıyıq. Hazırlıq üçün əla yerdir, ideal meydançalar, hava var.
- Amma ilk yoxlama oyununda Sloveniyaya 1:4 hesabıyla uduzdunuz...
- Gözlədiyimizdən də çətin matç oldu. Öz oyunumuzu göstərə bilmədik. Digər tərəfdən hakimlər də bizi sıxırdılar. Hər dəqiqə matçı saxlayırdılar, əleyhimizə qərarlar verirdilər ki, bu da oyunumuza təsirsiz ötüşmürdü. Uşaqlar da yorğun idilər.
- Yoxlama oyunu olsa da, darmadağını normal saymaq olmaz...
- Meydan sahiblərinin futbolçuları komandamızın üzvlərinə qarşı kobud oynayırdı, hakim isə buna göz yumurdu. Mən deyərdim ki, bu məğlubiyyətimizin yarı günahı hakimlərin üzərinə düşür.
- Amma millimizə 4 qolu hakimlər vurmayıb axı...
- Bu qədər qol buraxmaq mənim üçün də xoş deyil. Ən azından heç-heçə edəcəyimizi düşünürdüm.
- Sloveniya ilə ikinci oyununuzdan nə gözləyək?
- Qələbə qazanmalıyıq.
- Deyəsən, Şahruddin Məhəmmədəliyevdən qapını təhvil almısınız...
- Kimin oynayacağına dair qərarı məşqçilər korpusu verir. Onlar mənə güvənirsə, deməli, bu yerimi möhkəmləndirməliyəm.
- Qarşıda Bosniya və Herseqovina ilə də oyun var. Bu rəqib barədə nə bilirsiniz?
- Xüsusi bildiyimiz bir şey yoxdu. Onlarla qarşılaşmamışıq. Amma həmin oyuna da qələbə üçün çıxacağıq.
- AÇ-2017-nin seçmə mərhələsindəki son iki oyundan - Finlandiya və Farer adaları ilə görüşlərdən qələbə ilə ayrıla biləcəksiniz?
- Rəqiblərimizin hər biri futbol oynamağı bacarır. Asan olmayacaq. Amma biz turnir cədvəlində daha da üst pillədə qərarlaşmaq istəyirik. Bu şansı əldən verməməliyik.
- "Rəvan"ı başqa kluba dəyişəcəyinizi gözləməyə dəyər?
- "Rəvan" yeni mövsümdə Premyer Liqada oynamasa, pis olacaq. Uşaqlar elitada qalmaq üçün çox əziyyət çəkiblər. Bu klubun dağılmasını görmək istəmirəm. Mənə gəlincə, təkliflər var. Hər şeyə yaxın günlərdə aydınlıq gəlməlidir.