Qara Qarayev: Kanadanın daha güclü olması onlara da uduzacağımızdan xəbər vermir
Azərbaycan yığmasının yarımmüdafiəçisi Qara Qarayev Makedoniyaya qarşı yoxlama oyunundan (1:3) sonra azerisport.az saytının suallarını cavablandırıb.
- Niyə hər şey belə uğursuz alındı?
- Oyuna yaxşı hazırlaşmışdıq. Baş məşqçinin bütün tələblərini yerinə yetirməyə çalışdıq. Amma ilk yarıda müdafiədə buraxdığımız iki səhvə və hücumdakı passiv oyunumuz fasiləyə 0:2 hesablı məğlubiyyətlə yollanmağımıza səbəb oldu.
- Bəs fasilədən sonra nə dəyişdi?
- Gördüyünüz kimi, ikinci yarıda daha yaxşı oynadıq. Çoxlu qol vəziyyəti yaratdıq. Amma onların sadəcə, birindən yararlana bildik. Üçüncü qolu isə hücuma daha çox aludə olduğumuz üçün buraxdıq. Çünki ən azı hesabı tarazlaşdırmaq istəyirdik. Başqa deyiləsi heç nə yoxdur. Geridə ağır mövsüm qomuşuq. Yorğunluq hiss olunur.
- Andorranın (0:0) ardınca özümüzdən reytinqcə aşağı olan daha bir rəqibə qalib gələ bilmədik...
- Şübhəsiz ki, sərgilədiyimiz oyun barədə düşünməyə ehtiyac var. Belə oynamağa davam etmək olmaz.
- Tezliklə DÇ-2018-in seçmə mərhələsi start götürəcək. Bu, sizi narahat etmir?
- İndi səhv etmək daha yaxşıdır, nəinki rəsmi oyunlarda. Bu səhvlərimizi yaxşı analiz etməliyik. Hər bir uğursuz oyundan nəticə çıxarmağa ehtiyac var.
- Növbəti oyun Kanadaya qarşı olacaq...
- Rəqib güclüdür. Onlar Makedoniyadan da yaxşıdır.
- Deməli, özümüzü uğursuz nəticəyə hazırlayaq?
- Xeyr. Rəqibin güclü olması ona mütləq uduzacağımızdan xəbər vermir. Rəqib nə qədər güclü olsa, komanda həmin oyuna daha da məsuliyyətlə, ciddi yanaşır. Ümid edirəm ki, nəticə və oyun daha da yaxşı olacaq.