Rəhman Hacıyev: Makedoniyaya qalib gəlməyə çalışacağıq
Azərbaycan yığmasının və "Neftçi"nin yarımmüdafiəçisi Rəhman Hacıyev Avstriya toplanışı çərçivəsində Makedoniyaya qarşı oyun öncəsi azerisport.az saytının suallarını cavablandırıb.
- Toplanış necə gedir?
- Kubokun finalından sonra, mayın 26-da millinin düşərgəsinə gəldik. İlk gündə heç məşq də etmədik, yorğun idik. Andorra ilə oyuna baxdıq. İndi isə tam heyətlə Makedoniya ilə oyuna hazırlaşırıq. Qələbə qazanmaq istəyirik.
- Finalda uduzduğunuza görə, "Neftçi"nin futbolçularının psixoloji baxımdan qaydasında olmadığını demək olar?
- Əlbəttə, finalda məğlubiyyət çox üzücüdür. Özü də əlavə vaxtın sonlarında qol buraxdıq. Amma özümüzə gəlmişik. Tam olaraq yığmanın toplanışına, oyunlarına köklənmişik. İrəli baxmaq lazımdır. "Neftçi" hələ öz nəticələrini göstərəcək.
- Sabah sizi də start heyətdə görə bilərik?
- Bəli. Bu, mənim yığmada ikinci oyunum olacaq. Çalışacağam ki, komandamıza faydalı olum.
- Andorra ilə heç-heçədən sonra millimizdən bu dəfə nə gözləyək?
- Makedoniya Andorradan daha güclü, yaxşı rəqibdir. Oyunlarını da görmüşük. Onlarla sonadək mübarizə aparıb, qələbə qazanmağa çalışacağıq.
- Azərbaycan çempionatında ən yaxşı cərimə zərbəsi vuranlardan birisiniz. Zərbə vurmaq texnikası baxımından Kristiano Ronaldoya bənzəyirsiniz. Təsadüfən, ondan nümunə götürmürsünüz?
- Uşaqlıqda onun zərbə vurmaq texnikasına baxırdım, öz üzərimdə çalışırdım. Ola bilsin ki, bənzərlik var. Amma mən onu təkrarlamağa çalışmıram. Zərbələr üzərində yenə də çalışmağım lazımdır. Hər məşqdən sonra bunun üzərində çalışıram. Hərdən alınır, hərdən yox.