Anar Nəzirov: Andorra ilə görüşdə problem hiss etmədim
Azərbaycan yığmasının qapıçısı Anar Nəzirov Avstriya toplanışı çərçivəsind Andorraya qarşı oyundan sonra azerisport.az saytının suallarını cavablandırıb.
- Matçla bağlı fikirləriniz...
- Yığmamızın heyətində meydana xeyli gənc futbolçu çıxmışdı. Oyun bizim diqtəmiz altında keçdi. Sadəcə, qol vəziyyətlərindən yararlana bilmədik. Amma meydanda əsl mübarizə vardı. Hər futbolçumuz məşqçilərin verdiyi tapşırıqları yaxşı yerinə yetirməyə çalışırdı. Lakin top rəqib qapısına getmək istəmirsə, nə etmək olar?
- Matça start heyətdə çıxdınız və demək olar ki, 90 dəqiqə işsiz qaldınız...
- Bu, Mənim yığmada 90 dəqiqə meydanda olduğum ikinci oyunumdu. Birinci dəfə Estoniyaya qarşı, Berti Foqtsun dövründə belə oynamışdım. Amma Lixtenşteyn və Özbəkistana qarşı bir hissə oynamışam. Andorra ilə görüşdə problem hiss etmədim. Çünki müdafiə xəttimiz yaxşı çıxış etdi. Mən də qol buraxmamağa çalışdım.
- Andorra kimi cırtdan ölkə təmsilçisinə qalib gələ bilməməyimizi necə qiymətləndirirsiniz?
- Bizim heyətdə gənclər çox idi, əksəriyyəti debüt matçına çıxmışdı. Uşaqlar mübarizə apardılar, sadəcə, qol vurmağa nail ola bilmədilər. Qələbə qazanmalı idik. Lakin futbolda belə hallar da olur.
- Robert Prosineçki oyundan və nəticədən razı qaldı?
- O, oyundan razı, nəticədən narazıdır. Öz iradlarını bildirdi. Bu, yoxlama oyunudur. Səhvlərimizdən nəticə çıxarmalıyıq.
- Deməli, millidə əsas problem "vuran ayaq" problemidir?
- Prosineçki komandanın apardığı mübarizədən razıdır. Amma hər bir məşqçi istəyər ki, futbolçuları Andorra kimi rəqibə qalib gəlsin. Uşaqlar da hər şeyi etdilər, aqressiv oyun göstərdilər. Hər kəs qələbə qazanmaq üçün çalışdı, alınmadı. Əsas heyətin 8-9 futbolçusu bu gün meydanda deyildi.
- Oyundan sonra əsəbi görünürdünüz. Nə baş vermişdi?
- Nəticəyə görə məyus idim. İstədiyimiz nəticəyə nail ola bilmədiyimizə görə üzülürük. Amma alınmayanda alınmır.
- Qarşıda Makedoniya ilə oyun var...
- Makedoniya Andorradan daha ciddi rəqibdir. Onların futbolçuları Avropanın yaxşı klublarında çıxış edirlər. Yoxlama oyunu olsa da, həmin oyunda da nəticə bizim üçün vacibdir. Yaxşı oyun göstərməliyik.