Murad Səttarlı: Andorra heç-heçəyə oynayırdı
Azərbaycan yığmasının yarımmüdafiəçisi Murad Səttarlı Avstriya toplanışı çərçivəsində Andorraya qarşı yoxlama oyunundan (0:0) sonra azerisport.az saytının suallarını cavablandırıb.
- Matçla bağlı fikirləriniz?
- Oyuna nəzarət tam olaraq bizim tərəfimizdə idi. Bütün oyunu fasiləsiz hücum etdik, rəqib isə əks-hücum şansı axtarırdı. Onların müdafiə xəttini yarmaq çətin oldu. Çünki bütün komanda ilə müdafiə olunurdular. Buna baxmayaraq, çoxlu qol vəziyyəti yaratdıq. Təəssüf ki, onlardan yararlana bilmədik. Bir az bəxtimiz gətirsəydi, matçı asanlıqla qalib başa vurardıq.
- Yığmaya bir neçə dəfə dəvət olunsanız da, debüt matçınızı Andorraya qarşı keçirdiniz. Debütünüzlə bağlı nə deyə bilərsiniz?
- İlk oyunum olsa da, özümü yaxşı tərəfdən göstərməyə çalışırdım.
- Sizcə, Robert Prosineçkidən yenə dəvət ala biləcəksiniz?
- Onun haqqımda nə düşündüyünü demək çətindir. Çətin ki, bir oyuna görə nəticə çıxarsın. Qarşıda daha iki oyun, xeyli məşq var.
- Makedoniya və Kanada ilə oyunlarda şans gözləyirsiniz?
- Bəli, ümid edirəm ki, məni meydana buraxacaq.
- Millimiz "cırtdanlar"la oyuna ehtiyat qüvvə ilə çıxsa da, çətin ki, azarkeşlər bu komanda ilə heç-heçəni normal qarşılasınlar...
- Andorra ilə heç-heçə oynamaq bizim özümüzə də xoş deyil. Qələbə qazanmaq istəyirdik və qazanmalıydıq.
- Rəqib futbolçular meydanda çox aqressiv idilər. Hətta bir neçə dəfə futbolçular arasında mübahisə də düşdü...
- Razıyam. Yoxlama oyunu olduğunu nəzərə alsaq, rəqib futbolçuların aqressivliyi həddən artıq idi.
- Sizcə, bu, nədən irəli gəlirdi?
- Onlar bizim hücumlarımız qarşısında çatdırmırdılar, tez-tez vaxt öldürməyə çalışırdılar. Andorra heç-heçəyə oynayırdı. Bu nəticə onlar üçün qəbulolunandır, amma bizim üçün yox.
