Mahir Mədətov: Formada olsaydım, finalda qol şansımı qaçırmazdım
"Qarabağ"ın hücumçusu Mahir Mədətov ölkə kubokunun finalında "Neftçi" üzərində qazandıqları qələbədən sonra azerisport.az saytının suallarını cavablandırıb.
- Finalla bağlı təəssüratlarınız...
- Şübhəsiz ki, çətin oyun oldu. Amma bu vəziyyətdə düşməyimizin günahı özümüzdə oldu. Çünki əsas vaxtda qol vura bilmədik. Ələ düşən şansları dəyərləndirsəydik, hər şey fərqli olacaqdı. Elə mən özüm də matçın taleyini əsas vaxtda həll etməyə yaxın idim.
- Beş-altı metr məsafədən qapıya düşə bilmədiyinizə görə özünüzə inamı itirmədiniz ki?
- Xeyr. Sadəcə, onu düşündüm ki, bu matçda bir də belə yüz faizli qol imkanım olmaya bilər. Çox təəssüf ki, şansımı qaçırdım.
- "Neftçi"nin belə müdafiə olunacağını gözləyirdiniz?
- Müəyyən mənada onların müdafiədən oynayacağını bilirdik. "Neftçi" böyük klubdu, kubokun finallarında böyük təcrübəyə malikdir.
- Matçın sonlarında baş məşqçi Qurban Qurbanovun komandanı penaltilərə necə hazırladığını görürdünüz?
- Ola bilər, amma mənim bundan xəbərim yoxdur. Etiraf edim ki, ehtiyat oyunçular skamyasında oturanlar artıq penaltilər barədə düşünməyə başlamışdı. Amma matçın sonunda hamımız ayaq üstə qalxmışdıq və sanki qol olacağını hiss edirdik. Xoşbəxtəlikdən elə də oldu.
- "Qarabağ"dakı ilk ilinizdə həm çempion oldunuz, həm də kubok qazandınız. Mövsümü sizin üçün uğurlu saymaq olar?
- Bu uğurlara tək mən nail olmamışam. Buna bütöv bir komanda halında, rəhbərliyimizlə, məşqçilərimizlə, bizə köməyi dəyən hər bir kəslə nail olduq. Ola bilər ki, son turlarda özümü yaxşı tərəfdən göstərə bildim, qollar vurdum. Amma bu da kifayət etmir. Daha çox çalışmaq lazımdır. Məsələn, tam yaxşı formada olsaydım, "Neftçi" ilə oyundakı qol şansını boşa verməzdim. Ola bilsin ki, təcrübəm çatmır. Üzərimə daha da çalışmalıyam.
- Çempionlar Liqasında oynayacağınıza inanırsınız?
- İnam həmişə lazımdır. Qurban Qurbanov sağ olsun ki, mənə həmişə şans verir, güvənir. Çox ümid edirəm ki, "Qarabağ"a ÇL-də də kömək edə biləcəyəm.
- Mövsüm ərzində müsahibə vermədiniz, dediniz ki, Qurban Qurbanov icazə vermir. Bu qadağanın sizə hansısa faydası oldu?
- Kubokun final matçında start heyətdə meydana çıxdımsa, deməli, faydası olub (gülür). Görünür, baş məşqçimiz mənim ancaq oyunuma köklənməyimi istəirdi. Baş məşqçinin qərarına qarşı çıxmağa haqqım yoxdur. İstənilən halda o, mənim üçün ən yaxşı olanı deyir.
