Elvin Bədəlov: Neftçi bu heyətlə Avroliqada uğur qazana bilər
"Neftçi"nin müdafiəçisi Elvin Bədəlov Azərbaycan Kubokunun finalında "Qarabağ"a uduzduqları oyunu şərh edib. Azerisport.az saytına açıqlamasında o, bunları söyləyib:
"Əsl finala layiq oyun oldu. İki güclü komanda qarşılaşırdı. Komandalar mümkün qədər səhvsiz oynamağa çalışırdı. Məhz buna görə matçın əsas vaxtı heç-heçə başa çatdı. Əlavə vaxtın son dəqiqəsində qol buraxdıq. Halbuki, artıq penaltilər barədə düşünməyə başlamışdıq. Ola bilsin ki, bir anlıq konsentrasiyanı itirdik. Həm də 120 dəqiqəlik oyun yorğunluq da gətirmişdi. "Qarabağ" da əlinə düşən şansdan yaxşı yararlandı. Bu komandanı kuboku qazanması, "qızıl dubl" etməsi münasibətilə təbrik edirəm. Əlbəttə, biz də kuboku qazanmağı çox istəyirdik. Bunun üçün ağıllı oynamağa çalışırdıq. Düzdü, qol epizodlarımız elə də çox olmadı. Qırmızı vərəqəyə gəlincə, bu, sadəcə, emosiyadan irəli gəlirdi".
Müdafiəçi komandadakı gələcək taleyindən də söz açıb: "Başqa klublardan dəvətlər var. Amma mən "Neftçi"də qalmaq istəyirəm. Son zamanlar oyunumuz alınmağa başlayıb. Bu heyətlə yaxşı toplanış keçsək, Avropa Liqasında uğur qazana bilərik. Amma yeni oyunçular da alınsa, lap yaxşı olar".