Yunis Hüseynov: Kuboku da Qarabağ qazanacaq
"Xəzər Lənkəran"ın icraçı direktoru Yunis Hüseynovun azerisport.az saytına müsahibəsi
- "Neftçi"nin heyətində 1996-cı ildə "Qarabağ"ı kubokun finalında 3:0 hesabıyla məğlub etdiyiniz oyun yadınızdadır?
- Xatırladıqca, müəyyən şeylər yada düşür (gülür). İlk qolu Samir Ələkbərovun ötürməsindən sonra uzaq məsafədən zərbə ilə rəqib qapısından keçirdim. İkinci qolda Vidadi Rzayevə məhsuldar ötürmə etdim. Üçüncü qolu da Mais Əzimovun ötürməsindən sonra vurdum.
- "Neftçi" bu gün də eyni rəqiblə finalda üz-üzə gələcək. Keçmiş komandanız həmin uğuru təkrarlaya bilər?
- Xeyr. İndiki "Neftçi" 20 il əvvəlki nəticələri təkrarlayacaq gücdə deyil. Gərgin oyun olacaq, amma kuboku "Qarabağ" qazanacaq.
- Bəs "Qarabağ" necə, 20 il əvvəlki darmadağının qisasını ala bilər?
- Demək çətindir. Düzdür, ağdamlılar favoritdir. Amma bakılılar da bu oyunda bütün güclərini sərf edəcəklər. "Qarabağ" daha yaxşı formadadır, daha yaxşı oyun sərgiləyir. Onların avrokuboklarda da böyük təcrübəsi var.
- Sizə elə gəlmir ki, çempion olmuş "Qarabağ"la müqayisədə "Neftçi" futbolçuları uğura daha çox acdılar və motivasiyalıdırlar?
- 20 il əvvəl biz də çempion olmuşduq. Amma kubok oyununda da rəqibdən motivasiya baxımından qətiyyən geri qalmırdıq.
- "Xəzər Lənkəran"ın aqibəti necə olacaq?
- Klub rəhbərliyinin qərarını gözləyirik. Amma mən birinci divizionda oynayacağımıza inanmıram.
- Klub ləğv oluna bilərmi?
- Fikrimcə, bizi 2016/17 mövsümünə buraxacaqlar. "Xəzər Lənkəran" ölkə futboluna gözəllik qatır. Bu komanda Premyer Liqada qalmalıdır. Çünki klubumuz ən böyük azarkeş ordusuna malikdir. Yaxın günlərdə klub rəhbərliyi öz qərarını açıqlayacaq.