Ruslan Qurbanov: Neftçi finala tam hazırdır, kuboku qazanmaq istəyirik
"Neftçi"nin hücumçusu Ruslan Qurbanov Azərbaycan Kubokunun final matçı çərçivəsində "Qarabağ"a qarşı keçirəcəkləri oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Qarabağ"la oyuna tam hazırıq. Bu, bizim üçün bəlkə də mövsümün əsas oyunudur. Kuboku qazanmaq istəyirik. Amma rəqibin gücünü və səviyyəsini də yaxşı bilirik. Mövsümün son matçıdır. Fikrimcə, matçı izləməyə gələcək azarkeşlər də maraqlı oyunun şahidi olacaqlar".
Paytaxt klubunun forvardı rəqib qarşısında üstünlüklərindən də sözaçıb: "Çox yaxşı fanatlarımız var. Bu, bizim üstünlüyümüz sayıla bilər. Onlar bizə inanırlar, sonadək dəstəkləyirlər. Daha bir üstünlüyümüz yerli və gənc futbolçulardan ibarət heyətimizin olmasıdır. "Qarabağ" görüşün favoritidir. Çünki ardıcıl üç mövsümdür ölkə çempionu olur. Amma final bir oyundan ibarət olur. Buna görə də biz qələbə qazanmaq üçün hər şeyə hazırıq".
Qurbanov mümkün hakim səhvlərindən də söz açıb: "Mən ölkə kubokunun finalının əcnəbi hakimə tapşırılmasını istəmirəm. Azərbaycanda da yaxşı hakimlər var. Fikrimcə, kimin hakim təyin olunmasının fərqi yoxdur. İstənilən hakim səhv edə bilər. Əsas odur ki, həmin səhvlər nəticəyə təsir etməsin".
"Premyer Liqanın son mövsümünü bombardir kimi başa vurmaq istəyərdim. Amma 13 qol vura bildim. Bu, mənim üçün yaxşı nəticədir. Dani Kintananı da vurduğu 15 qol və bombardir olması münasibətilə təbrik edirəm".
Hücumçu sonda öz gələcək planları barədə danışıb: "Təkliflər var. Bunu reklam xatirinə demirəm. Amma məni heyətində görmək istəyən klublar ilk növbədə "Neftçi" ilə əlaqə saxlamalıdırlar".
