Neftçi Qarabağa yenə qızıl dubl imkanı yaradacaq?
Bu gün Azərbaycan Kubokunda 2015-2016-cı illər mövsümünün final oyunu keçiriləcək. Azerisport.az xəbər verir ki, ardıcıl 2-ci, ümumilikdə 3-cü dəfə həlledici qarşılaşmada “Qarabağ”la “Neftçi” üz-üzə gələcək.
Kubokda 11-ci dəfə yolları kəsişən komandalar əvvəlki 10 dueldə 18 matçda üz-üzə gəliblər. 6 dəfə “Qarabağ”, 4 dəfə “Neftçi” mərhələdə qalib gəlib. Ümumi qələbə sayında da üstün olan Ağdam klubu 8, paytaxt təmsilçisi 5 dəfə qələbə qazanıb. Daha beş oyun heç-heçə bitib. Topların fərqində isə "ağ-qaralar"ın cüzi üstünlüyü var - 16:15. Kubokdakı son 3 qarşılaşmada hər iki komanda qol vurub.
Bu komandaların əvvəlki kubok duellərindən yalnız iki matç finala təsadüf edib. İlk dəfə 1995/96 mövsümündə bu iki klub həlledici matçda üz-üzə gəliblər. Həmin oyunda "Neftçi" 3 cavabsız qolla qalib gələrək, baş mükafata sahib çıxıb. Sonuncu dəfə isə Ağdam və paytaxt klubları ötən mövsüm kubokun finalında qarşılaşıblar. Bu dəfə isə ağdamlılar ilk 3:1 hesabıyla qalib gələrək, həm də "qızıl dubl"a imza atmışdılar.
Qurban Qurbanovun komandası yenə "qızıl dubl"a imza atmaq arzusundadır. Premyer Liqada çempionluğu bir neçə tur öncədən təmin edən, çempionatdakı son oyunları kuboka hazırlıq kimi başa vuran ağdamlılar "Neftçi" ilə duelin aşkar favoriti sayılırlar. Hər halda paytaxt klubunun çempionatı altıncı pillədə başa vurması da çempionla müqayisədə hansı durumda olduğunun göstəricisi sayıla bilər.
Amma Vəli Qasımovun baş məşqçi təyinatından sonra "Neftçi"nin həm nəticələrində, həm də oyununda irəliləmə hiss olunur. Komandanın "Qəbələ"ni mübarizədən kənarlaşdırıb, finala yüksəlməsi də təsadüfi deyil. Paytaxt klubu bu oyunda titul qazanmaqla nəinki bu, hətta son mövsümlərdəki uğursuzluğu unutdurmağa çalışacaq. Bu, avrokuboklar öncəsi komandaya ünvanlanan çoxsaylı tənqidlərin də azalmasına şərait yarada bilər.
Azərbaycan Kuboku
Final
25 may (çərşənbə)
20:00. “Qarabağ” - “Neftçi”
Hakimlər: Fariz Yusifov, Yaşar Abbasov, Elman Musayev, Munis Abdullayev.
Əlavə köməkçi hakimlər: Rəhim Həsənov, Ömər Paşayev.
AFFA nümayəndəsi: Elbrus Abbasov.
Hakim-inspektor: Əli Hüseynov.
Bakı. Tofiq Bəhramov adına Respublika stadionu.