Joze Alesio: Azərbaycan ən çətin qrupa düşüb
Futzal üzrə Azərbaycan yığmasının sabiq baş məşqçisi Joze Alesio millimizin dünya çempionatında İran, İspaniya və Mərakeşlə bir qrupa düşməsinə münasibət bildirib. Azerisport.az saytına açıqlamasında o, bunları söyləyib:
"Futzalda öncədən proqnoz vermək çox çətindir. Amma mənə elə gəlir ki, Azərbaycan yığması İran və İspaniya komandası ilə mübarizə apara bilər. Bu komandanın öz ənənələri var, ən güclü komandalardan biri hesab olunur. Düzdür, Azərbaycan ilk dəfə dünya çempionatında iştirak edəcək. Amma dəfələrlə Avropa çempionatında oynamışkomandadır. Bu baxımdan təcrübəsi var. Mümkün qədər tez bir zamanda baş məşqçini müəyyənləşdirmək, heyəti komplektləşdirmək lazımdır. Çünki DÇ-nin startına artıq elə də çox vaxt qalmayıb. Hər şeyi zamanında etmək lazımdır. Buna nail olsalar, Kolumbiyada uğura ümid bəsləmək olar".
Braziliyalı mütəxəssis millimizin rəqibləri barədə də danışıb: "İranın dünya çempionatlarında böyük təcrübəsi var, güclü komandadır. Onlar mundialın yarımfinalına, finalına qədər irəliləməyi bacarırlar. İspaniya barədə nəsə demək artıq olar. Avropa və dünya çempionudur. Buna görə hesab edirəm ki, Azərbaycan yığması ən çətin qrupa düşüb. Amma bir məqam da var ki, indi istənilən rəqibə qarşı oynamaq olar. Sadəcə, bunun üçün Azərbaycan yığması baş məşqçi məsələsini həll etməlidir. Çünki yeni baş məşqçi heyətdə dəyişiklik edə bilər".
"Azərbaycandan çoxdandır heç kimlə əlaqə saxlamıram. Mənə elə gəlir ki, Azərbaycan Futzal Federasiyası atıq yeni baş məşqçi ilə razılığa gəlib. Azərbaycan yığmasına DÇ-də uğurlu çıxış etmək üçün yeni oyunçular lazımdır. Onların arasında yerlilər də olmalıdır".