Kamran Ağayev: Bizim futbolda təəccüblənəsi çox şey var
Azərbaycan yığmasının və "İnter"in qapıçısı Kamran Ağayevin azerisport.az saytına müsahibəsi
- Mövsümün son matçında "Zirə"yə minimal hesabla qalib gəldiniz. Matçla bağlı fikirlərinizi bilmək maraqlı olardı...
- Meydana qələbə üçün çıxmışdıq. Əfsuslar olsun ki, hava şəraiti oyunumuza təsirsiz ötüşmədi. Amma mənə elə gəlir ki, biz rəqibdən daha yaxşı oynadıq. Bu da aydın məsələdir. Çünki "Zirə" gümüş medalı özü üçün təmin etmişdi, biz isə hələ "bürünc" uğrunda mübarizəmizi davam etdirirdik. Qələbə qazansaq da, bürünc medal bizə qismət olmadı. "Kəpəz"in "Qəbələ"yə məğlub olacağını gözləmirdim. Nə baş verdiyi aydındır. Amma biz "Qəbələ" və "Neftçi"yə uduzduq ki, bunda da özümüz günahkarıq. Əsas odur ki, mövsümü zədəsiz başa vurduq.
- İdman Arbitraj Məhkəməsinin qərarı açıqlanmadığından hələ də "İnter"in avrokuboklara gedib-getməyəcəyi bilinmir. Siz müsbət sonluğa inanırsınız?
- Biz bacardığımızı etdik. Mənim klubla müqaviləmin müddəti başa çatıb. Hələ komandada qalıb-qalmayacağımı bilmirəm. Qala da bilərəm, gedə də. Getsəm, "İnter"ə uğurlar arzulayıram. Yaxşı komandadı, yaxşı kollektivi var. Bütün futbolçulara "İnter" kimi komandada oynamağı arzulayıram.
- Avrokuboklardan kənarda qalmağınız azarkeşləri çox təəssüfləndirəcək. Bəs sizi?
- Avrokuboklarda oynamağı hər futbolçu arzulayır. Amma şadam ki, mövsümü zədəsiz başa vurdum.
- Zədədən belə qorxursunuz?
- Çox. İndi də ayağımda ağrılar var. Zədə aldıqdan sonra yenidən meydana qayıtmaq çox çətin olur. Azarkeşlər bizi ancaq meydanda görürlər. Amma zədələndiyimiz dövrlərdə nə çəkdiyimizi bilmirlər. Məsələn, Elnur Abdullayevi götürək. Çətinliklə əvvəlki formasını bərpa etmişdi, yenidən zədələndi.
- Avrokuboklarda oynaya biləcəyiniz bir kluba keçməyiniz mümkündür?
- Mən yalan danışmaq, özümü reklam etmək istəmirəm. Bunu öz maaşını artırmağa çalışan futbolçular edirlər. Mən yığma komanda ilə toplanışa yollanacağam. Bu işlərlə də menecerim məşğul olacaq. Həm yerli, həm də əcnəbi klublardan təkliflər var. Amma mən düzgün seçim etmək istəyirəm. Fikrimcə, "İnter"ə keçməklə də səhv etmədim.
- Keçmiş klubunuz "Karşıyaka" Türkiyə PTT 1-ci liqasını tərk etdi...
- Klub rəhbərliyi qeyri-peşəkar çalışanda, belə də olmalıdır. Mən bu komandaya keçəndə elə oyunçular almışdılar ki, Super Liqaya çıxacağımızı düşünürdüm. Amma sonra klubdakı əsl vəziyyəti görəndən sonra fikrim dəyişdi.
- Yığmamızın Avstriya toplanışına dəvət alan futbolçular arasında sizi təəccübləndirənlər var?
- Düzünü deyim ki, heyətlə tam tanış deyiləm. Bircə onu bilirəm ki, məndən əlavə qapıçılardan Anar Nəzirovla Səlahət Ağayevə dəvət göndəriblər. Təəccüblənməyə gəlincə, Azərbaycan futbolunda təəccüblənəsi çox şey var. Hamımız Azərbaycan yığmasını təmsil edirik. Dünənə qədər atamızın oğlu idik, indi xalqın oğluyuq.
- Baş məşqçi Robert Prosineçki son dövrlərdə bəzi açıqlamaları ilə Berti Foqtsu xatırladır. Onun sözlərindən belə başa düşmək olar ki, biz ancaq San-Marino ilə oyunda qələbəyə ümid edə bilərik. Siz də belə düşünürsünüz?
- Mən özümə inanıram. Uduzmağı sevmirəm. Uduzanda da meydançanı dağıda bilərəm. Əlbəttə, belə olmamalıdır. Bu, Prosineçkinin öz fikridir. Amma biz növbəti seçmə mərhələdə əlimizdən gələni edəcəyik.
- Yəqin ki, 17 yaşlıların Avropa çempionatını izləyirdiniz. Orada gələcəyin Kamran Ağayevini gördünüz?
- Oyunlara baxdım. Amma indidən belə bir nəticə çıxarmaq tezdir. Bizdən əvvəl də qapıçılar olub, bundan sonra da olacaq. Biz çox çətinliklər görmüşük. Amma indiki şəraitdə daha yaxşı qapıçılar üzə çıxmalıdır.