Dani Kintana: Artıq qitə arenasında uğur qazanmaq haqda düşünməliyik
"Qarabağ"ın yarımmüdafiəçisi Dani Kintana Topaz Premyer Liqasında vurduğu 15 qolla mövsümün bombardiri seçilməsi münasibətilə bəzi sualları cavablandırıb. Azerisport.az sizi həmin açıqlamalarla tanış edir.
- Premyer Liqanın ən yaxşı bombardiri olacağını gözləyirdiniz?
- Mövsümün əvvəlindən qarşımıza yalnız çempionatın qızıl medallarını qazanmaq hədəfi qoyulmuşdu. Bu, bizim üçün daha vacib idi. Ona görə də mövsümün bombardiri olmaq mənim üçün ikinci dərəcəli mükafatdır. Amma təbii ki, belə bir mükafatı almaq çox xoşdur.
- Özünüzə bu yolda əsas rəqib kimi görürdünüz?
- Şübhəsiz ki, Nelson Bonilyanı. O, bütün mövsüm ərzində yaxşı oyun sərgilədi, lider idi. Amma sonda mən onu qabaqlamağa nail oldum.
- Mövsümü necə dəyərləndirərdiniz?
- Çətin mövsümü geridə qoyduq. Sonluq bizim üçün uğurlu hesab oluna bilər. Artıq avrokuboklarda yeni uğurlar qazanmaq barədə düşünməliyik.
- Əvvəlki illərlə müqayisədə "Qarabağ" bu mövsüm daha asanlıqla uğur qazandı. Bəs sizin üçün hansısa çətinlik oldumu?
- Bütün mövsümü məşq etdik, çalışdıq, hər bir oyunda sonadək vuruşduq. Çempionluğu bir neçə tur öncədən təmin etməyimiz az zəhmət çəkməyimizin, işimizin asan olduğunun göstəricisi sayılmamalıdı.
- Qarşıda "Neftçi" ilə kubokun final matçı var...
- Gördüyünüz kimi, çempionluğu bayram etməyə də vaxt yoxdur. Bu oyundan dərhal sonra final matçı üçün hazırlığa başlayacağıq.
- Rəqibiniz heç də yaxşı mövsüm keçirmir. Yəqin ki, sizin üçün finala ən uyğun rəqibdir. Razısınız?
- Finalda kiminlə qarşılaşmağından asılı olmayaraq, həmişə ağır olur. "Neftçi" bu mövsüm heç nəyə nail olmayıb. Bu üzdən də şübhəsiz ki, kuboku qazanmağa çalışacaqlar. Bu da bizim işimizi çətinləşdirir.