Kamran Ağayev: Böyük hədəfləri olan klubun üç heyəti olmalıdır
"İnter"in hücumçusu Kamran Ağayev Azərbaycan Kubokunun yarımfinal mərhələsi çərçivəsində "Qarabağ"a qarşı keçirdikləri cavab oyunundan sonra azerisport.az saytının suallarını cavablandırıb.
- İlk oyunda 0:4 hesabıyla uduzduğunuzu nəzərə alsaq, cavab matçına hansı hədəf üçün çıxmışdınız?
- Meydana nə üçün çıxırlar ki? Qələbə qazanmaq üçün. Biz də bunun üçün mübarizə apardıq. Amma uduzduq. Nə etmək olar? "Qarabağ"ı finala çıxması münasibətilə təbrik edirəm. Bu gün üçün bu komanda doğrudan da ölkənin ən yaxşısıdır. Demək olar ki, "Qarabağ"ın üç heyəti var. Qarşısında böyük hədəflər olan komandada belə də olmalıdır.
- Matç qeyri-adi məkanda - "Əlincə Arena"da keçirilirdi...
- Bu stadionun bu qədər gözəl olacağını gözləmirdim. Çox xoşuma gəldi. Bu arenanı kimin, necə tikdiyini bilmirəm. Amma əladır.
- Sizi bu mövsüm yəqin ki, avrokuboklarda görə bilməyəcəyik. Buna görə üzülmürsünüz?
- Hər bir futbolçu Avropa Liqası, Çempionlar Liqası kimi turnirlərdə oynamaq istəyir. Amma buna hər futbolçu, hər komanda nail ola bilmir. Əsas zədədən qaçmaqdır. Yenicə forma yığmağa başlamışdım ki, yenidən zədələndim. Bir ay oynamadım.
- Yayda "İnter"lə müqavilənizin müddəti başa çatır. Yeni müqavilə üçün danışığınız olub?
- Bununla menecerim məşğul olur. Mənim işim futbol oynamaqdır.
- Klubda işlərin tədricən qaydasına düşdüyünü nəzərə alsaq, yəqin ki, qalmaq istəyirsiniz...
- Fikrimcə, heç bir komandada vəziyyət pis deyil. Əsas odur ki, klubun özündə problem olmasın, hədəfləri olsun.
- Yayda avrokuboklarda mübarizə aparacaq klublarımızdan hansınasa keçidiniz mümkündür?
- Hazırda belə bir söhbət yoxdur. Karyera davam edir, sabah harada olacağını bilmirsən. Yalan danışmaq, özümü reklam etmək istəmirəm. Bilirsiniz ki, mənim xarakterimdə belə şeylər yoxdur.
- Mayın sonunda millimizin Avstriya toplanışına dəvət alacağınıza inanırsınız?
- Hələ necə olacağını bilmirəm. Yığmanın qapıları hər bir futbolçunun üzünə açıqdır. Dəvət etsələr, gedəcəyəm. Dəvət etməsələrdə, ürəyim həmişə bu komandanın yanındadır.