Ölkə kubokunda finalçılar bəlli olur
Bu gün Azərbaycan kubokunda 1/2 final mərhələsinə yekun vurulacaq. Azerisport.az xəbər verir ki, kubok uğrunda mübarizəni davam etdirən komandalar cavab yarımfinal oyunlarına çıxacaqlar.
İlk finalçının adına Qəbələdə aydınlıq gələcək. Bu bölgənin eyni adlı təmsilçisi doğma meydanda "Neftçi" ilə qarşılaşacaq. Tərəflər arasında böyük qalmaqalla yadda qalan ilk oyun 1:1 hesabıyla başa çatıb. Bu üzdən də cavab oyununda meydan sahiblərini hətta qolsuz heç-heçə də qane edəcək. "Ağ-qaralar" isə mütləq ya daha bol qollu heç-heçəyə imza atmalı, ya da mütləq qələbə qazanmalıdırlar.
Xatırladaq ki, indiyədək kubokda yolları yalnız 1 dəfə kəsişən komandalar iki il əvvəl finalda qarşılaşıblar. Maraqlıdır ki, heç-heçə (1:1) başa çatan həmin matçın taleyini penaltilər seriyası həll edib. Daha dəqiq (3:2) olan “Neftçi” kubokun sahibi olub. Bu dəfə isə "Qəbələ"nin bu rəqibini yenib finala çıxmaq şansları daha yüksək qiymətləndirilir.
Yarımfinalın digər cütündə isə demək olar ki, hər şey aydındır. "Qarabağ" səfərdə 4 cavabsız qolla məğlub etdiyi "İnter"lə cavab matçını tamamilə formallığa çevirib. Bu üzdən hər iki komandanın Masazırda baş tutacaq qarşılaşmaya optimal heyətlə çıxmayacağı gözlənilir. Bir sözlə, "Qarabağ" artıq final matçını düşünür.
Qeyd edək ki, kubokda 3 dəfə yolları kəsişən komandalar 5 oyunda qüvvələrini sınayıblar. 1/8 və 1/4 finala təsadüf edən əvvəlki illərdəki duellərdə iki oyunun yekununda “İnter” qalib gəlib. Yeganə final matçında isə “Qarabağ” üstün olub. 7 ildən sonra bu yarışda üz-üzə gələn komandalar ilk dəfə yarımfinalda münasibətlərini aydınlaşdırır.
Azərbaycan Kuboku
Yarımfinalın cavab oyunları
4 may (çərşənbə)
16:00. “Qəbələ” - “Neftçi” (ilk oyun - 1:1)
Hakimlər: Fariz Yusifov, Yaşar Abbasov, Namiq Hüseynov, Rəvan Həmzəzadə.
AFFA nümayəndəsi: Elbrus Abbasov.
Hakim-inspektor: Əli Hüseynov.
Qəbələ şəhər stadionu.
19:00. “Qarabağ” - “İnter” (ilk oyun - 4:0)
Hakimlər: Ramil Diniyev, Azər Əsgərov, İsgəndər Əliyev, Rövşən Rəcəbov.
AFFA nümayəndəsi: Ramiz Abdullayev.
Hakim-inspektor: Şahin Cəfərov.
Masazır. "Əlincə Arena".