Krneta: Layiq olduğumuz avrokubok mövsümünü buraxmaq üzücü olar
"Zirə"nin serbiyalı müdafiəçisi Yovan Krneta Topaz Premyer Liqasının 32-ci turu çərçivəsində "Qarabağ"a qarşı keçirəcəkləri oyun öncəsi azerisport.az saytının suallarını cavablandırıb.
- Çempionluğunu rəsmiləşdirməyə hazırlaşan liderlə oyundan nə gözləyirsiniz?
- Mövsümün əvvəlində "Zirə"nin çempionluq uğrunda mübarizə aparmasını heç kim düşünmürdü. Biz indi də yalnız ilk üçlükdə olmağa çalışırıq. Yeni komandayıq, çempionatda ilk mövsümümüzdür. "Qarabağ"a gəlincə, Azərbaycanın ən güclü komandasıdır. Mənə elə gəlir ki, çempion olmağa da layiqdirlər.
- Sizin də ikinci pilləni əldən verməyiniz inandırıcı görünmür. İzləyicinizlə 8 xallıq fərqiniz var...
- Düzdür, üçüncü pillə ilə xal fərqimiz böyükdür. Amma bu, arxayınlığa əsas vermir. Bizə daha iki qələbə lazımdır. Buna görə sonadək mübarizə aparmalıyıq. Hətta ikinci yeri təmin etsək belə, sonadək yaxşı oynamalı, qələbə qazanmağa çalışmalıyıq.
- "Qarabağ"a qalib gəlməyə çalışacaqsınız, ya bunu mümkünsüz hesab edirsiniz?
- Bizim onlarla sadəcə, bir heç-heçəmiz var. Ən yaxşı futbolumuzu oynayıb, uğurlu nəticə qazanmağa çalışacağıq. Belə oyunları sevirəm. Çünki futbolçu özünü göstərmək şansı qazanır. Hər bir futbolçumuz qələbə üçün çalışacaq.
- "Qarabağ"ın heyətində kimi qeyd edərdiniz?
- Ad açıqlamaq istəməzdim. Amma bu komanda kollektiv olaraq xoşuma gəlir. Hər bir futbolçu meydandakı işini çox yaxşı bilir. Onlar Çempionlar Liqsında qrup mərhələsinə düşməli idilər. Şotlandiya "Seltik"i ilə oyunlarda bəxtləri gətirmədi. Onları keçsəydilər, sonuncu mərhələdə İsveç "Malmö"sünü də məğlub edə bilərdilər.
- Bəs "Zirə" də "Qarabağ" səviyyəsinə çıxa bilərmi?
- Niyə də olmasın? Biz hamımıza buna çalışırıq.
- Ağdamlıların çempionluğu məhz sizin meydanınızda bayram etməsini necə qarşılardınız?
- Mənim üçün fərqi yoxdur. Belə alınacaqsa, nə edə bilərəm?
- "Zirə"nin avrokuboklara buraxılacağına hələ də ümidiniz qalıb?
- Şübhəsiz ki. Çünki hələ bununla bağlı yekun və rəsmi qərar açıqlanmayıb. Ona görə də ümidliyik. Layiq olduğumuz avrokubok mövsümünü buraxmaq üzücü olar. Bu mövsüm Avropada debüt etmək istəyirik. Hamımız buna hazırıq.