Rəşad Sadıqov: Qarabağ cavab matçında da öz oyununu oynayacaq
"Qarabağ"ın kapitanı Rəşad Sadıqov Azərbaycan Kubokunun yarımfinal mərhələsi çərçivəsində "İnter"ə qarşı keçirdikləri oyundan sonra jurnalistlərin suallarını cavablandırıb. Azerisport.az sizi təcrübəli müdafiəçinin fikirləri ilə tanış edir:
- Artıq finalda olduğunuzu demək olar?
- Bu sualı gözləyirdim. Əlbəttə, böyük hesabla qalib gəldiyimizə görə finala xeyli yaxınlaşdıq. Amma futbol arxayınlığı sevmir. Ona görə də sonadək mübarizə aparmaq lazımdır. Qarşıda cavab matçı var.
- Maraqlıdır ki, "Qarabağ" bu cür qələbəni elə də çox güc sərf etmədən qazandı...
- Hesab böyük olsa da, oyun ağır keçdi. Çempionatın son turunda da "İnter"lə qarşılaşmışdıq. Onlar bizim oyunu yaxşı analiz etmişdilər. Hücumlar qurmaqda çətinlik çəkirdik. Qurban Qurbanov bizə daha yaxşı oynamağı tapşırdı. Sonda istədiyimiz nəticəyə nail ola bildik.
- "Qarabağ"ın prezidenti Tahir Gözəl də komandanızın bu gün istənilən səviyyədə oynamadığını vurğuladı...
- Bu fikirlə tamamilə razıyam. Kubok oyunlarında qol buraxmaqdan qalib gəlmək vacibdir. İlk iki qolu yaxşı kombinasiya yaratmaqla vurduq. Həm də "İnter" güclü rəqibdir. Buna görə də ehtiyatlı oynamağa çalışırdıq. Düşünürdük ki, rəqib qol vursa, müdafiədə oturacaq.
- Cavab matçında üstünlüyünüzü qorumağa çalışacaqsınız, ya hesab arasındakı fərqi daha da artırmağa?
- Biz yenə də öz futbolumuzu oynayacağıq. "Qarabağ"da çıxış etmək böyük şərəfdir. Bizi bu qədər azarkeş dəstəkləyir. Başqa cür edə də bilmərik.
- Qarşıda sizi "Zirə" ilə həlledici əhəmiyyət daşıyan çempionat matçı gözləyir. Çempionluğu təmin edə biləcəksiniz?
- Bunu gözəl başa düşürük. Yaxşı oyun sərgiləyib, qələbə qazanmağa və çempionluğu təmin etməyə çalışacağıq.
- "Bankirlər"in heyətində vaxtilə sizinlə birgə çıxış edən Rauf Əliyev və Vüqar Nadirov çıxış edirdi. Onlar yəqin ki, "Qarabağ"a qol vurmağı çox istəyirdi. Hətta epizodların birində sizin Nadirovla "söhbətiniz" də düşdü...
- Onların hər ikisi bilir ki, mənim üçün əzizdilər. Mənim üçün də sevindirici haldır ki, onların hər ikisi start heyətdə meydana çıxmışdılar və yaxşı mübarizə apardılar. Onların oynaması Azərbaycan yığması üçün də faydalıdır. Qol da vura bilərdilər. Şansları da oldu. Amma qapıçımız yaxşı oynadı.