Bədavi Hüseynov: Başqa kluba keçmək barədə düşünmürəm
"Qarabağ"ın müdafiəçisi Bədavi Hüseynov Azərbaycan Kubokunun yarımfinal mərhələsi çərçivəsində "İnter"ə qarşı keçirəcəkləri ilk oyun öncəsi azerisport.az saytının suallarını cavablandırıb.
- Sizi kubokun yarımfinalında bir neçə gün öncə asanlıqla yendiyiniz "İnter" gözləyir...
- "İnter" çox az qol buraxır. Bu da onların müdafiə xəttinin necə keçilməz olduğunun göstəricisidir. Eyni zamanda son oyunda onların aparıcı oyunçularının bəzisi bizimlə görüşdə iştirak etmirdi.
- Sizə elə gəlmir ki, "bankirlər" həmin görüşdə bütün imkanlarını göstərmədilər?
- Mənim fikrimcə, kubok matçında hər şey fərqli olacaq. Burada səhvləri bağışlamırlar. Bizə çox diqqətli oynamaq lazımdır. Necə ki, bunu son matçda bacardıq.
- Səfər oyununda sizin üçün ən yaxşı hesab edilə bilən nəticə nədir? Məsələn, heç-heçə?
- Ən əhəmiyyətlisi, ilk matçda qol buraxmamaqdır. Eyni zamanda qol vurmağa çalışmalıyıq. Finala yollanmaq üçün səfər oyununda qol vurmaq bizim üçün çox vacibdir.
- "İnter"i keçsəniz, yəqin ki, "Neftçi" ilə keçən ilki final təkrarlanacaq. Yoxsa siz finalda "Qəbələ" ilə oynamaq istərdiniz?
- Hələ biz bu barədə düşünmürük. İndi bütün diqqətimiz "İnter"lə oyunlara yönəlib.
- Bu oyundan sonra sizi çempionatda "Zirə" ilə həlledici xarakter daşıyan vacib matç gözləyir. Həmin oyunda çempionluğu təmin edə biləcəksiniz?
- Başa düşürük ki, bu oyun bizi çempion edə bilər. Ona görə də bizim üçün yaxşı bir motivasiya olacaq.
- Bu mövsüm çempionatın səviyyəsi əvvəlki kimi deyil. Düşünmürsünüz ki, bu, komandanızın avrokuboklardakı çıxışına təsir göstərə bilər?
- Mən çempionatın zəif olduğunu deməzdim. Avrokuboklar uğrunda necə mübarizə getdiyini görürəm. Birdən-birə 6-7 klub buna iddia edir. Düşünürəm ki, biz hər hansı bir problemlə üzləşərik.
- Maraqlıdır ki, çoxdandır sizin adınız başqa klublarla yanaşı çəkilmir...
- Mənim "Qarabağ" ilə iki illik müqaviləm var. Bu komandada hər şey məni qane edir. Bu üzdən də hər hansı bir keçid haqqında düşünmürəm.