Stanislav Namaşko: Bizi məhz buna görə cəzalandırdılar
AZAL-ın qapıçısı Stanislav Namaşko Topaz Premyer Liqasının 31-ci turu çərçivəsində "Rəvan"a qarşı keçirdikləri oyundan (0:1) sonra ölkəsinin mətbuatına müsahibə verib. Azerisport.az sizi həmin müsahibə ilə tanış edir.
- Bütövlükdə götürsək, hazırda AZAL-da atmosfer yaxşıdır. Biz bu mövsüm birləşən və dost olan bir kollektiv formalaşdıra bildik. Hər oyunda sonadək mübarizə aparır, uğur qazanmağa çalışırıq.
- Amma son turda çempionatın autsayderi "Rəvan"a məğlub oldunuz...
- Buraxılan qola qədər heç də özümüzə yaraşan kimi oynamırdıq. Rəqib də bizi məhz buna görə cəzalandırdı. Bu oyunda üç xal itirməyimiz çox üzücü oldu.
- Çempionatın sonuna beş tur qalıb, sizi isə avrokuboklar zonasından 7 xal ayırır. AZAL avrokuboklarda mübarizə aparmağa qadirdir?
- Bizim avrokuboklara vəsiqə qazanmaq şansımız var. Amma doğrudan da belə bir uğura imza atmaq istəyiriksə, bunun üçün çox böyük güc sərf etməliyik.
- Necə düşünürsən, İqor Dobrovolskinin çalışdırdığı Moldova yığmasına qayıtmağın mümkündür?
- Fikrimcə, bunu ancaq İqor İvanoviç özü bilər. Yığma komandaya kimləri çağırmağa o qərar verir. Kimi lazım bilirsə, onlara da dəvət göndərir.
- Dobrovolski sizinlə əlaqə saxlayıb, bu mövzuda söhbət edibmi?
- Xeyr mənimlə əlaqə saxlamır. Bu, İvanoviçin stilinə uyğun deyil.
- Dəvət alsanız, yığmaya kömək etməyə hazırsınız?
- Əlbəttə! Mən Moldova yığmasına kömək etməyə hər zaman məmnuniyyətlə hazıram!.
(Moldavskiy futbol)