Anyete: Hakimlik haqda danışmağın mənası yoxdur
"Neftçi"nin yarımmüdafiəçisi Anyete Topaz Premyer Liqasının 21-ci turu çərçivəsində "Xəzər Lənkəran" üzərində 1:0 hesabıyla qalib gəldikləri oyundan sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Çətin oyun oldu. Belə olacağını bilirdik. Amma əsas qələbədir ki, ona da nail olduq.
- Bu iki klub arasındakı görüşləri "Böyük oyun" adlandırırlar. Hansısa ajiotaj hiss etdiniz?
- Bizdə yetərincə motivasiya var idi. Digər çempionat oyunları ilə müqayisədə bu gün stadiona daha çox azarkeş gəlmişdi. Bu oyunun vacib olduğunu bilirdik.
- Bu oyunda iki mübahisəli epizod oldu. Hakimin rəqib qapısına penalti təyin etməməsi sizi narazı salmadı?
- Hakim iki təmiz penaltimizi vermədi. Amma mən daha hakimlik barədə danışmaq istəmirəm. Çünki mənası yoxdur.
- Nikolas Kanalesin yenidən "Neftçi"yə qayıtmasını necə qarşıladınız?
- Onu şəxsən tanımıram. Amma komandamıza qayıtmasından xəbərim var. Hücumçu dəvət ediblərsə, deməli, komandada bu mövqe ilə bağlı problem var. Mənə gəlincə, sırf hücumçu deyiləm.
- Ehtiyatda qalmaqdan qorxmursunuz?
- Ola bilər. Amma biz bir komandayıq. Baş məşqçinin də hər qərarına hörmətlə yanaşırıq.
- Qarşıda "Qarabağ"la oyun var...
- Qələbə qazanmaq üçün əlimizdən gələni edəcəyik. Çünki ölkənin ən yaxşı komandasına qarşı mübarizə aparacağıq.
