Araz Abdullayev: Xəzər Lənkəranla oyunda azarkeşləri sevindirəcəyik
"Neftçi"nin kapitanı Araz Abdullayev Topaz Premyer Liqasının 20-ci turu çərçivəsində "Rəvan"a qarşı keçirdikləri oyundan (1:1) sonra azerisport.az saytının suallarını cavablandırıb.
- Oyunu necə şərh edə bilərsiniz?
- Düzünü desəm, birinci hissədə öz oyunumuzu göstərə bilmədik. İkinci yarıdaisə rəqibi qapısına doğru sıxışdıra bildik. Sadəcə, fasilədən dərhal sonra qapımızda qol gördük. Buna baxmayaraq, komandamız ruhdan düşmədi və çoxlu qol epizodları yaratmağa nail oldu.
- Bəs bir topdan artığını vurmağınıza nə mane oldu?
- "Rəvan" layiqli matç keçirdi. Rəqibi təbrik edirəm. "Neftçi"dən xal almaq az iş deyil. Azarkeşlərimizi növbəti oyunlarda sevindirməyə çalışacağıq.
- Bu, "Rəvan"la oyunlarda "Neftçi"nin ardıcıl ikinci xal itkisidir. Niyə bu komanda ilə oyunlarınız alınmır?
- "Qarabağ", "Qəbələ" kimi komandalarla oyunlara daha yaxşı köklənirik. Amma digər klublarla görüşlərdə özünüz də gördüyünüz kimi, bu, istənilən səviyyədə olmur. "Rəvan"ın haqqını da yemək istəməzdim. Bu cür komandalar da bizə qarşı yaxşı oynayırlar. Biz yenə də qələbə qazanmalı idik və buna borcluyduq. Alınmadı.
- Hakimi tez-tez alqışlayırdınız...
- Bunda qəribə heç nə yoxdur. Biz onunla dostuq. Qələbə qazanmaq istəyirdik. Oyunun tempi qalxanda onun enməsini istəmirik. Hakim də belə epizodlar zamanı oyunu saxlayanda, bu, bizi özümüzdən çıxarır.
- Qarşıda "Xəzər Lənkəran"la oyun var...
- Bu, bizim üçün vacib oyundur. Xal itirmək istəmirik. Azarkeşlərimizi sevindirməyə çalışacağıq.
