Tahir Süleymanov: Bunu Emil Mpenzanın yazdığına inanmıram
"Neftçi"nin sabiq hücumçusu Emil Mpenza öz feysbuk səhifəsindən klubun keçmiş vitse-prezidenti Tahir Süleymanova müraciət edib. Azerisport.az xəbər verir ki, o, Süleymanovdan "Neftçi"nin ona borclu olduğu 800 min dolların ödənilməsini tələb edib.
Amma Süleymanov azerisport.az saytına açıqlamasında bu müraciətin Mpenza tərəfindən edildiyinə inanmadığını bildirib: "Aydın məsələdir ki, kimsə belə bir səhifə yaradıb, orada status yaza bilər. Bunu kim yazıbsa, ona sualım var. İlk növbədə onu başa düşə bilmirəm ki, Emil Mpenza məsələsi ilə bağlı niyə mənim CAS-a yollanmağıma şərait yaratmadılar? Komandanın keçmiş tərcüməçisi Tural Piriyev niyə orada klub rəsmisi kimi təmsil olunub? Bu məsələ ilə bağlı klubun Müşahidə Şurasının iclasına dəvət olunarkən orada öz şərtlərimi bildirmişdim. Onlardan niyə yararlanmadıqlarını anlamıram. Avropadan vəkil dəvət etmişdilər. Mpenza niyə bizim dövrümüzdə istəyinə nail ola bilmirdi? Amma indi kluba sanksiyalar tətbiq olunur".
Keçmiş vitse-prezident "Neftçi"yə gəlişini də xatırlayıb: "Almaniyalı məşqçi Gede klubdan ayrılandan sonra ona 5 milyon dollar ödəməli idik. Amma biz həmin məbləği 2,5 milyona endirdik və ödədik. Sonuncu dəfə 1,8 milyon cərimə ödəmişdik. Bu da 2012-ci ildə olmuşdu. Bütün bunlara baxmayaraq, biz heç kimə şikayətlənmirdik, əksinə, Avropa Liqasının qrup mərhələsinə çıxmışdıq. Biz heç keçmiş klub rəhbərliyini tənqid etmirdik. İndiyə qədər də susmuşuq. Kiminsə şübhəsi varsa, onlara rəsmi sənədləri göstərməyə də hazıram".
Süleymanovun sözlərinə görə, paytaxt klubu onların dövründə gəlir əldə edib: "Bizim rəhbərliyimiz dövründə klubun xəzinəsinə 7 milyon dollar daxil olmuşdu. Biz həmin pulu avrokuboklardakı çıxışdan, transferlərdən və "Adidas"dan qazanmışdıq. Klub Avropa Liqasının qrup mərhələsinə vəsiqə qazanmışdı. Elə həmin gəlirlər sayəsində Mpenza məsələsini bağlamaq olardı. İndi keçmiş rəhbərliyi kluba ziyan vurmaqda ittiham etmək lazım deyil".
Sabiq vitse-prezidenti paytaxt klubunda indi də problem olmadığını iddia edib: "Neftçi"də maliyyə problemi yoxdur. Mən bunları demək istəmirdim. Amma hər dəfə indiki rəhbərliyin keçmiş klub rəsmilərini günahlandırmasına dözmək olmur. Biz bu klub üçün az iş görməmişik".