Rahid Əmirquliyev: Yerli klublardan birinə keçməyim daha yaxşı olardı
"Xəzər Lənkəran"ın kapitanı Rahid Əmirquliyevin azerisport.az saytına müsahibəsi
- Rasim Ramaldanov "Xəzər Lənkəran"ı tərk edən ilk futbolçu oldu. Amma digər təcrübəli futbolçuların da komandadan getməyə hazırlaşdığı bildirilir. Siz nə qərar vermisiniz?
- Artıq klub rəhbərliyi ilə söhbət etmişik. Razılığa da gəlmişik. Dekabrın sonundan etibarən "Xəzər Lənkəran"dan ayrılacağam. Heç bir inciklik yoxdur. Qarşılıqlı razılıq əsasında ayrılmağa qərar verdik.
- Yəqin ki, əhvalınız heç də yaxşı deyil...
- Mən bu klubdan gedişimi belə təsəvvür etmirdim. Çünki neçə ildir bu komandada çıxış edirdim. Amma indiki vəziyyət bu şəkildə ayrılmağımızı şərtləndirdi.
- Bəs mətbuatda adları hallandırılan digər futbolçuların taleyi necə olacaq?
- Komandadan getmək istəyən hər bir futbolçu klub rəhbərliyi ilə ayrılıqda görüş keçirəcək. "Xəzər Lənkəran" gələn ildən ancaq gənc futbolçulara üstünlük verəcək.
- Dekabrın sonunadək "Xəzər Lənkəran"ın həm kubokda, həm də Premyer Liqada oyunları var. Siz həmin görüşlərdə iştirak edəcəksiniz?
- Həmin görüşlərdə oynayacağam. Komandaya kömək etmək üçün əlimdən gələni edəcəyəm.
- Hələ yayda sizinlə "Qəbələ"nin baş məşqçisi Roman Qriqorçukun maraqlandığı bildirilirdi...
- Mən də bu barədə eşitmişdim. Amma özümlə heç kim danışıq aparmamışdı. Dekabrdan sonra harada oynayacağım hələ məlum deyil.
- Başqa ölkəyə getməyiniz mümkündür, ya Azərbaycanda qalmağa üstünlük verəcəksiniz?
- Xarici klublardan iki təklif var. Biri Türkiyə klubudur. Digərini isə demək istəmirəm. Amma etiraf edim ki, vətəndə qalmaq daha yaxşı olardı.
- Açıq danışsaq, sizin kimi futbolçu ilə hazırda ancaq "Qəbələ", "Qarabağ" və "Neftçi" maraqlana bilər...
- Niyə ki? Digərləri də maraqlana bilər. "Qəbələ" və ya "Qarabağ" mənimlə maraqlanmasa, necə olacaq?
- Hər halda bu, inandırıcı görünmür ki, siz avrokuboklara düşmək şansları az olan komandalara, məsələn, "Kəpəz"ə keçəsiniz...
- Əlbəttə, mən də qarşısına hər mövsüm yüksək hədəflər qoyan klubda oynamaq istəyərəm. Amma hələ yerli klublardan heç bir konkret təklif almadığımdan, bu barədə danışmaq çox tezdir. Bütün bu işlərlə menecerim məşğul olur.