Rəhman Hacıyev: Neftçi indi oyunlara daha ciddi hazırlaşır
"Neftçi"nin yarımmüdafiəçisi Rəhman Hacıyev Topaz Premyer Liqasının 14-cü turunun "Qarabağ"a qarşı oyunundan sonra azerisport.az saytının suallarını cavablandırıb.
- Ağdam klubu ilə oyunu necə şərh edə bilərsiniz?
- Oyun çox ağır keçdi. Amma biz meydana qələbə üçün çıxmışdıq. Uzun müddət idi "Qarabağ"a qalib gələ bilmirdik. Ona görə də bu qələbəmizə çox şadam. Sonadək mübarizə apardıq və zəhmətimizin bəhrəsini gördük. Matçdakı yeganə qolu mən vursam da, bu qələbə bütöv komandanın uğurudur. Artıq "Qarabağ"la oyun geridə qaldı. Qarşıdakı görüşlərə hazırlaşmalıyıq.
- Samir Əliyevin gedişindən, Əsgər Abdullayevin gəlişindən sonra "Xəzər Lənkəran" və "Qarabağ"a qalib gəlmisiniz. Komandada nə dəyişib ki?
- Sadəcə, futbol belədir. Zəif rəqib olmur. Biz bunu hər oyunda görürük. Ciddi heç nə dəyişməyib. Amma oyunlara daha ciddi hazırlaşırıq.
- Belə çıxır ki, Samir Əliyevin dövründə komandada motivasiya və özünəinam istənilən səviyyədə deyildi?
- Mən belə deməzdim. Əvvəlki uğursuzluqları mən bəxtsizliklə əlaqələndirərdim.
- "Neftçi"nin yenidən avrokuboklara vəsiqə uğrunda mübarizəyə qoşulduğunu demək olar?
- Əlbəttə. Biz də bunun üçün çalışırıq. "Neftçi" elə klubdur ki, onun adı çox şey deyir. Biz hər oyuna qələbə üçün çıxırıq. Hətta kubok görüşlərində də uğurlu nəticə üçün mübarizə aparacağıq.
- Birinci hissədə cərimə zərbəsini Ruslan Qurbanov vursa da, hədəfə düşə bilmədi. Amma ikinci yarıda siz cərimə zərbəsini qola çevirdiniz...
- Birinci epizod zamanı o, özünə inandığını və zərbə vurmaq istədiyini bildirdi. Mən də dedim ki, bir halda özünə inanırsan, vur. Amma növbəti epizodda mənə dedi ki, sən vur. Üstəlik, bildirdi ki, tələsmə, həyəcanlanma.
- İkinci hissədə topu daha çox özünüzdə saxlamağınız baş məşqçinin tapşırığı idi?
- Birinci hissədən sonra Əsgər Abdullayev oyunla bağlı bəzi tapşırıqlar verdi və biz fərqli oynamağa başladıq. Hərdən geriyə qayıdır, hərdən də komanda yoldaşlarımı əks-hücuma çıxarırdım. Bir sözlə, baş məşqçinin dediklərini etməyə çalışırdım.