Rauf Əliyev: Qarabağın çempionluq uğrunda rəqibi yoxdur
Azərbaycan yığmasının və "İnter"in hücumçusu Rauf Əliyev zədəsindən, millimizin Moldovaya qarşı yoxlama oyunundan (2:1), eləcə də klubundakı vəziyyətdən danışıb. Azerisport.az saytına açıqlamasında o, öncə bunları söyləyib:
"Müalicəm davam edir. Klubun idman zalında məşq edirəm. Amma qaçmağa bir ay sonra başlayacağam. Bunu vaxtından öncə edə bilmərəm. Almaniyadakı həkimlərin tapşırığı belədir".
Əliyev millimizin Moldova üzərindəki qələbəsindən danışıb: "Komandamız normal oynadı. Mümkündür ki, ikinci hissədə uşaqlar bir qədər zəif təsir bağışladılar. Amma nəzərə almaq lazımdır ki, heyətdə gənc futbolçular çox idi. Ona görə də matçın gedişində hansısa problemlərin yaranması normal idi. Əsas ili qələbə ilə başa vurmaq idi. Hücum xəttində Ağabala Ramazanovun çıxışı çox xoşuma gəldi. Qol da vurdu. Hiss olunurdu ki, çox çalışır. İnanıram ki, yaxşı gələcəyi olacaq".
"İnter"in hazırkı vəziyyətinə gəlincə, təbii ki, maliyyə baxımından əvvəlki kimi deyil. Amma maaşımızı alırıq. Komandada hər şey yaxşıdır. Uşaqlar növbəti oyuna hazırlaşırlar. Hər oyunda qələbə üçün mübarizə aparırıq. İnanıram ki, mövsümün sonunda Avropa Liqasına vəsiqə qazanacağıq".
Rauf Premyer Liqadakı çempionluq mübarizəsindən də danışıb: "Mənə elə gəlir ki, hazırda "Qarabağ"ın çempionluq uğrunda rəqibi yoxdur. Bu komanda bütün göstəricilərdə rəqiblərini qabaqlayır. Mümkündür ki, "Qəbələ" mövsümün əvvəlində bu mübarizəyə qoşulmuşdu. Amma bu komanda artıq xeyli xal itirib və gələcəkdə də belə olacağı şübhə doğurmur. Qalan bütün komandalar ancaq Avroliqaya düşmək üçün mübarizə apara bilər".