Samir Əliyev: 2002-ci ildə İtaliya yığmasının ehtiyat oyunçular skamyasında da ulduz futbolçular oturmuşdu
Azərbaycan yığmasının sabiq hücumçusu Samir Əliyev AÇ-2016-nın seçmə mərhələsi çərçivəsində İtaliyaya qarşı oyun öncəsi azerisport.az saytının suallarını cavablandırıb.
- Azərbaycan - İtaliya matçından nə gözləyirsiniz?
- Maraqlı oyun olacaq. Fikrimcə, yığmamız italyanlara müqavimət göstərə və yaxşı oyun sərgiləyə biləcək. Futbolçularımız son dörd oyunda uduzmamaqlarının təsadüfi olmadığını isbatlamalıdırlar.
- Sizcə, İtaliyadan xal almaq üçün Xorvatiya ilə görüşdəki kimi müdafiə futbolu sərgiləmək lazımdır?
- Fikrimcə, mənim bu barədə nəsə deməyimə ehtiyac yoxdur. Bu, düzgün olmazdı. Yəqin ki, Robert Prosineçki italyanlara qarşı necə oynamaq lazım olduğunu yaxşı bilir. Biz bunu oyunda görəcəyik.
- Belə bir fikir var ki, İtaliya yığması 2002-ci ildə yığmamıza qarşı oynayarkən indikindən daha güclü idi...
- Hər kəsin öz fikri var. Mən də belə düşünürəm ki, 2000-ci illərdə İtaliya yığması daha güclü idi. Əsas heyəti demirəm, hətta ehtiyat oyunçular skamyasında da ulduz futbolçular yer alırdı. Bunu onların gücündə də görmək olurdu.
- İtaliyaya qarşı Bakıdakı görüşü (0:2) necə xatırlayırsınız?
- Həmin oyun artıq tarixin yaddaşına köçüb. Biz uduzsaq da, həmin görüşlə bağlı xoş xatirələrim var. Səhv etmirəmsə, İtaliya yığması o zaman ilk dəfə Bakıya gəlmişdi. Böyük ajiotaj var idi. Oyun da yaxşı keçmişdi.
- Bu dəfə oyun 60 mindən çox azarkeş tutan Bakı Olimpiya stadionunda keçiriləcək. Sizcə, azarkeşlər stadionu doldura biləcəklər?
- Bu, çox xoş olardı. Tam doldura bilməsələr də, ən azı 40-50 min azarkeş gəlsə, bunun özü də yaxşı göstərici sayıla bilər.
- Yığmamızın heyətində İtaliya ilə matçın taleyini həll edə biləcək futbolçular var?
- Kimisə xüsusi fərqləndirmək istəməzdim. Futbol kollektiv oyundur. Mən də millimizdən meydanda kollektiv oyun görmək istəyirəm.