Fizuli Məmmədov: Fərdi səhvlər olmasa, millimiz İtaliyaya uduzmayacaq
Azərbaycan yığmasının sabiq futbolçusu Fizuli Məmmədov AÇ-2016-nın seçmə mərhələsi çərçivəsində İtaliyaya qarşı keçiriləcək oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"İtaliya ilə oyun digərlərindən fərqlənəcək. Ən azından ona görə ki, bizi titullu komanda ilə oyun gözləyir. Düzdür, bir müddət öncə Xorvatiya kimi rəqiblə görüşmüşdük və bu komandanı İtaliyadan zəif hesab etmirəm. Sadəcə, italyanlar onlardan fərqli dördqat dünya çempionudurlar. Komandanın baş məşqçisi Antonio Konteni dünyanın ən yaxşı mütəxəssislərindən hesab edirəm. Onun öz məşqçilik fəlsəfəsi var. Çox intizamlı komandası var. Millimizin italyanlarla oyunu çox gərgin və çətin olacaq. Amma Robert Prosineçkinin də bu oyun üçün öz planları var. Əminəm ki, o, rəqibin oyununu ciddi analiz edib. Komandamız son dörd oyunda məğlub olmayıb. Bu üzdən italyanları da çətin oyun gözləyir. Bunu yəqin ki, Konte özü də başa düşür. Millimizi bu oyunda dəstəkləmək üçün Olimpiya stadionuna çoxlu azarkeş gələcək. Fikrimcə, millimiz taktiki baxımdan rəqibindən geri qalmayacaq. Elə fiziki hazırlıq baxımından da eyni sözləri demək olar. Əsas kobud fərdi səhvlərə yol verməmək lazımdır. Belə səhvlərdən qaça bilsək, Azərbaycan İtaliyaya uduzmayacaq. Erkən qol buraxmasaq, rəqibi gərginlikdə saxlaya bilərik. Futbolçularımıza, məşqçilər korpusuna uğurlar arzulayıram. Ümid edirəm ki, məğlubiyyətsiz oyunlar seriyamız davam edəcək".
