Elnur Məmmədov azarkeşlərin istefa şüarına münasibət bildirdi
"Neftçi"nin icraçı direktoru Elnur Məmmədov Topaz Premyer Liqasının 7-ci turu çərçivəsində "Zirə"yə qarşı səfər oyunu zamanı azarkeşlərin onu istefaya səsləməsinə münasibət bildirib. Azerisport.az saytına açıqlamasında o, bunları söyləyib:
"Neftçi" kimi komanda uduzanda şübhəsiz ki, azarkeşlər kimisə günahlandırmalıdırlar. Mən azarkeşlərlə görüşdüm. Nəticədən narazı qaldıqları üçün belə istefa şüarları səsləndirən 5-6 nəfər idi. Bir neçə saniyə "istefa" qışqırdılar. Bunun qəsdən edildiyini düşünmürəm. Bu, emosional addım idi. Biz həmin azarkeşləri qınamırıq. Bizim azarkeşlərimiz, veteranlarımız ən yaxşılardandırlar. Şəxsən mən belə hesab edirəm. Azarkeşlərimizlə mütəmadi görüşürük, bundan sonra elə görüşlərimiz olacaq. Azarkeşlərimizin bu cür narazılığı komandamız üçün də bir motivasiya olmalıdır. "Qarabağ"la oyunda bizim səfərdə oynadığımızı hiss etdirməyən azarkeşləri heç vaxt unutmaq olmaz. Ona görə də azarkeşlərin bu narazılığını anlayışla qəbul etmək lazımdır".
Məmmədov "Zirə" ilə matçın hakimliyindən də danışıb: "İndi çempionat oyunları daha intensiv keçirilməyə başlayıb. Hakimlər də komandalarla ayaqlaşmaq üçün öz üzərlərində çalışmalıdırlar. Lakin hər şeyə görə hakimləri günahlandırmaq fikrimiz də yoxdur. Meydana çıxıb elə oynamaq lazımdır ki, hakimlik çıxışımıza və nəticələrimizə təsir göstərməsin. Bu mövsüm iki oyunda uduzmuşuq, hər ikisində də azlıqda qalmışıq. Bizim Tofiq Bəhramov kimi hakimimiz olub. Onun kimi mötəbər yarışları idarə edən hakimlərin olmasını çox istəyərdik. Bunun üçün isə onların öz üzərində daha çox işləməsi lazımdır. Amma hər şeydə onları günahlandırmaq da düzgün deyil".