Tino Peres: Azərbaycan heç vaxt dünya çempionatında oynamayıb, vəziyyəti dəyişməliyik
Futzal üzrə Azərbaycan yığmasının baş məşqçisi Tino Peresin azerisport.az saytına müsahibəsi
- AÇ-2016-nın final mərhələsinin püşkünü necə qiymətləndirə bilərsiniz?
- Normal püşkdür. Avropa çempionatı çox güclü turnirdi. Şəxsən mənə rəqib seçmək şansı verilsəydi, çox böyük çətinlik çəkərdim. Rəqiblərin hamısı yaxşıdır. İtaliya son Avropa çempionudur, Çexiya da təcrübəli komandadır. Reytinq baxımından qrupumuzun üçüncüsüyük. Amma buna baxmayaraq, şansımız var. Biz də sonadək mübarizə aparacağıq.
- Belqraddakı püşkatmaya siz də getmişdiniz. Rəqiblərlə görüşünüz oldu?
- Bəli. Söhbət etdik. Bütün komandalar bir-birinə hörmətlə yanaşdı.
- Yığmamız son iki tsikldə qrupdan çıxa bilməyib. Bu dəfə necə olacaq?
- Biz qrupdan çıxmaq istəyirik. Gənc oyunçularımız var. Çalışmaq lazımdır. Bunun üçün vaxtımız da var.
- Son AÇ-də Azərbaycan İtaliyaya 0:7 hesabıyla uduzub. İtalyanların hazırda zəifləmədiyini nəzərə alsaq, həmin nəticə yenidən təkrarlana bilər?
- Biz bunu istəmirik. Azərbaycan yığması dəyişib. Şübhəsiz ki, qarşımızda da yeni hədəflər var. Bu hədəflərin arasında böyük hesablı məğlubiyyət yoxdur.
- Dünya çempionatının seçmə mərhələsindəki şanslarımız barədə nə düşünürsünüz?
- Komandamızda özünəinam yaranıb ki, bu, çox vacib məsələdir. Azərbaycan dünya çempionatında heç vaxt oynamayıb. Ümid edirəm ki, biz bu dəfə vəziyyəti dəyişə biləcəyik. Qrupda minimum ikinci yeri tutmalıyıq ki, ən azı pley-offa vəsiqə qazanaq. Xorvatiya və Belarus güclü komandadır. İlkin təsnifat mərhələsindən gələcək rəqibimizin də kimliyindən asılı olmayaraq, uğur qazanmağa çalışacağıq.
- Bu ilin dekabr və gələn ilin fevral ayı millimiz üçün çox vacib olacaq. Necə hazırlaşmağı düşünürsünüz?
- Bizə təlim-məşq toplanışı və yoxlama oyunları lazımdır. Noyabrda Moskvaya toplanışa getməyi planlaşdırırıq. Orada Rusiya yığması ilə yoxlama görüşləri keçirməliyik. Hələ ki, qarşıdakı planlarımızla bağlı bunları deyə bilərəm.