Qara Qarayev: Xorvatiya yığmasında Modriçlə Rakitiç varsa, bizdə də Kamran Ağayev var
Azərbaycan yığmasının və "Qarabağ"ın yarımmüdafiəçisi Qara Qarayevin azerisport.az saytına müsahibəsi
- "Qarabağ"ın yığmaya cəlb olunan futbolçuları istirahətə imkan tapa bilmədilər. Bu, problem yaratmayacaq?
- Avropa Liqasının pley-off mərhələsi çərçivəsində İsveçrə "Yanq Boyz"u ilə cavab matçının ertəsi günü yığmanın düşərgəsinə qoşulduq. Ona görə də xüsusi istirahət imkanımız olmadı. Amma toplanış müddətində məşq etməklə yanaşı, daha çox yatmağa çalışıram. Şəxsən mən yaxşı istirahət etmişəm (gülür).
- "Qarabağ"ın qrup mərhələsində "Tottenhem", "Monako" və "Anderlext"lə bir qrupa düşməsini necə qarşıladınız?
- Azərbaycanın iki klubunun eyni vaxtda qrup mərhələsinə vəsiqə qazanması ölkəmizdə çox böyük sevincə səbəb oldu. Bu, biz futbolçulara da xoşdur. İnsanlara sevinc bəxş etmək bizim əsas hədəfimizdir. Rəqiblərimizə gəlincə, bizi çətin oyunlar gözləyir. Amma eyni zamanda "Qarabağ" azarkeşləri doğma meydanda adlı-sanlı klubların oyunlarını canlı görə biləcəklər.
- "Qarabağ"ın transfer pəncərəsinin son günündə bir neçə transfer həyata keçirməsi sizi sevindirdi?
- Düzünü desəm, yığmanın düşərgəsində olduğuma görə klubla əlaqəm yoxdur. Heç yeni alınmış futbolçuların kim olduğundan da xəbərsizəm. Amma onların komandamıza faydalı olacağını düşünürəm. Bizə yeni oyunçular lazım idi. Çünki iki cəbhədə mübariz aparmaq çətin olacaqdı.
- Xorvatiya ilə oyun öncəsi millidə atmosfer necədir?
- Xorvatiyanın hazırda Avropanın ən yaxşı komandalarından biri olduğunu anlayırıq. Bunun üçün elə rəqibin heyətinə nəzər salmaq yetərlidir. Demək olar ki, bütün futbolçuları top-klublarda çıxış edirlər. Heyət baxımından biz onlara uduzuruq. Onların heyətində Modriç, Rakitiç kimi futbolçular var, bizdə də Kamran Ağayev (gülür). Amma bizim komanda da hazırda Osiyekdə 6 cavabsız qol buraxan yığma deyil. Komandada atmosfer də dəyişib. Azarkeşlərin bizə olan inamını da geri qaytara bilərik. Tam dolu tribunalar gözləyirik.
- Meydanın mərkəzində Modriç və Rakitiçlə tez-tez üz-üzə gələcəksiniz...
- Məni "el klasiko" gözləyir (gülür). Bu, "Real" və "Barselona"nın aparıcı oyunçuları ilə bir oyunda iştirak etmək üçün əla fürsətdir. Amma onlarla görüş məni qorxutmur. Avropa Liqasında adlı-sanlı futbolçularla çox qarşılaşmışıq.
- Bəs Malta ilə oyun barədə nə düşünürsünüz?
- Xorvatiya ilə oyunda çox güc itirəcəyimizi nəzərə alsaq, Malta ilə səfər matçı çətin olacaq. Öncə xorvatlarla görüşdə uğur qazanmağa çalışmalıyıq. Ondan sonra Vallettada keçiriləcək qarşılaşmanı düşünə bilərik.
