Samir Əliyev: Neftçidə belə bir anlayış yoxdur
"Neftçi"nin baş məşqçisi Samir Əliyevin azerisport.az saytına müsahibəsi
- Türkiyə toplanışı çərçivəsində keçirdiyiniz son yoxlama matçında yerli "Antalyaspor"a qalib gəldiniz (2:0). Oyunla bağlı nə deyə bilərsiniz?
- Qələbə qazandığımız üçün şadam. Ən vacibi oldur ki, ilk dəfə yoxlama oyunlarında qol buraxmadıq. Qələbə qazansaq da, buna çətinliklə nail olduq. Səhvlərimiz yenə var idi, amma bu, normaldır. Rəqibin də qol vurmaq üçün bir neçə real vəziyyəti oldu. Sadəcə, yararlana bilmədilər. Həm də Aqil Məmmədov ən yaxşı oyunlarından birini keçirdi. Bu yoxlama oyunları bizim hansı çatışmazlıqlarımızın olduğunu, nəyin üzərində daha çox çalışmalı olduğumuzu göstərdi. Bəzi futbolçuların öz üzərində daha çox çalışmasına ehtiyac var.
- Komandadakı əsas çatışmazlıqlar nədən ibarətdir?
- Hər bir komandanın çatışmayan cəhətləri olur. Bizim də həmçinin. Ancaq indi həmin çatışmazlıqları açıqlamağım düzgün olmaz. Oyundan oyuna həmin problemləri yoluna qoymağa çalışacağıq.
- Artıq əsas heyətdə hansı futbolçulara güvənəcəyinizi müəyyənləşdirmisiniz?
- Bizdə ümumiyyətlə, elə bir anlayış yoxdur. "Neftçi"nin istənilən futbolçusu, istənilən vaxt start heyətdə meydana çıxa bilər.
- "Neftçi" mövsümün startına qədər yenə transfer edəcək?
- Gücləndirmək istədiyimiz mövqelər var. Həmin mövqelərə yeni futbolçu axtarışımız davam edir. Bu işlərlə məşğul olan əməkdaşlarımız var.
- "Neftçi"nin baxışa çağırdığı Borislav Stoyçevlə bağlı nə qərar verdiniz?
- Biz tələsik qərar qəbul etmək istəmirik. Legioner yerli futbolçudan bir baş üstün olmalıdır.
- Nikolas Kanales, Rauf Əliyev və Ernest Nfor getdikdən sonra hücum xəttinə yalnız Ruslan Qurbanovla Məhəmməd Qurbanovu cəlb etdiniz. Hücuma yeni futbolçunun alınması mümkündür?
- Əlbəttə, bu, heç də pis olmazdı. Hər bir məşqçi istəyər ki, əlinin altında mümkün qədər çox yaxşı futbolçusu olsun. Mən də eləcə.
- Yeni mövsümün açılış turunda sizi "Kəpəz"lə oyun gözləyir...
- Gəlin, hələ bu barədə danışmayaq. "Kəpəz"lə matç barədə oyun ərəfəsində danışarıq.