Ronni Deyla: Seltik daha yaxşı oynaya bilər
Şotlandiyanın "Seltik" klubunun baş məşqçisi Ronni Deyla ölkə çempionatının ilk turu çərçivəsində "Ross Kaunti" üzərində qazandıqları 2:0 hesablı qələbəni şərh edib. Azerisport.az xəbər verir ki, UEFA Çempionlar Liqasının ikinci təsnifat mərhələsi çərçivəsində Azərbaycan çempionu "Qarabağ"ın rəqibi olan Qlazqo klubunun çalışdırıcısı öncə bunları söyləyib:
"Daha yaxşı oynamağımızı hamımız istəyirik. Bu gün "Seltik" 60 dəqiqə yaxşı oynadı. Amma son yarım saatda komanda kimi mübarizə apara bilmədi. Futbolçular tez-tez top itirirdilər və bu, məyus etməyə bilməz. Aydın məsələdir ki, ardıcıl oyunlardan sonra futbolçularda yorğunluq yaranıb".
Deyla eyni zamanda müsbət məqamlardan da söz açıb: "Şadam ki, Kris Kommons bu gün əla çıxış etdi. Ley Qriffits də "Qarabağ"la cavab oyununa qədər tam hazır olmalıdır. Çünki ona daha çox oynamaq şansı verməyə ehtiyac var. Qarşıdakı oyunda ən yaxşı hazırlığa malik olanlar çıxış edəcəklər".
"Seltik"in çalışdırıcısı heyətdəki zədəlilərdən də söhbət açıb. Amma o, Nir Bitton, Çarlz Malqryu və Mikael Lustiqin tezliklə sıraya dönəcəyini bəyan edib.
Qeyd edək ki, "Qarabağ" "Seltik"lə səfər matçında 0:1 hesablı məğlubiyyətlə üzləşmişdi. Bu komandalar arasında cavab görüşü avqustun 5-də Bakıda, Tofiq Bəhramov adına Respublika stadionunda keçiriləcək və saat 21:30-da start götürəcək.