İlqar Qurbanov: Qarabağ üçün Qlazqoda qol vurmaq çox vacibdir
"Qarabağ"ın müdafiəçisi İlqar Qurbanov UEFA Çempionlar Liqasının üçüncü təsnifat mərhələsi çərçivəsində Şotlandiyanın "Seltik" klubuna qarşı keçirəcəkləri ilk oyun öncəsi azerisport.az saytının suallarını cavablandırıb.
- Səfər oyununda hansı nəticəyə ümid edirsiniz?
- "Seltik" barədə artıq sözə ehtiyac yoxdur. Çünki bu komandanın gücü hər kəsə bəllidir. Bunu Avropa arenalarında dəfələrlə sübut edib. Böyük tarixə malik klubdur. Bizi çox ağır oyun gözləyir. Hər halda Çernoqoriya "Rudar"ı ilə görüşlərdən daha çətin olacaq.
- İlk matçın səfərdə olması sizin üçün üstünlük sayıla bilər?
- Rəqibin "Seltik" olduğunu nəzərə alsaq, heç bir üstünlükdən söhbət gedə bilməz. Bu üzdən də ilk matçın səfərdə və ya evdə olması arasında fərq yoxdur. İstənilən halda bizə çətin olacaq.
- Amma "Seltik" əvvəlki qədər nəhəng klub təsiri bağışlamır...
- Mən elə deməzdim. Onlar bu gün də əvvəlki qədər qorxuludurlar. Əla komandaları var, üstəlik, yeni transferlər də ediblər. Həmişəki kimi, bu mövsüm də iddialıdırlar.
- "Qarabağ" Qlazqoda necə oynayacaq?
- Qol vurmağımız çox vacibdir. Allah eləsin ki, sərfəli nəticə əldə edək.
- "Seltik"in baş məşqçisi Ronni Deyla bəyan edib ki, ÇL-in qrup mərhələsinə vəsiqə qazanmağa iddialıdırlar...
- O, baş məşqçidir və istədiyini deyə bilər. Amma sonda necə olacağını oyunlar göstərəcək.
