Böyükağa Hacıyev: Heç vaxt Azərbaycan millisinə belə rəqiblər qismət olmayıb
"Neftçi"nin sabiq çalışdırıcısı Böyükağa Hacıyev azerisport.az saytına müsahibəsində futbol üzrə Azərbaycan millisinin 2018-ci ildə keçiriləcək dünya çempionatının seçmə mərhələsindəki rəqiblərini dəyərləndirib. Məşqçinin sözlərinə görə Azərbaycan millisinin bəxti gətirib:
"İndi kim nə deyəcək, bilmirəm. Amma etiraf etmək lazımdır: millimizin bəxti hələ belə gətirməmişdi. Elə qorxulu komandalarla düşməmişik. Almaniya istisna olmaqla, demək olar ki, onlarla oynamaq olar. Ürəkdən söyləmək istərdim ki, Robert Prosineçkinin bəxti gətirdi".
Hacıyev yığmanın rəqibləri haqda bunları deyib: "Dünya çempionu Almaniya haqda danışmağa dəyməz. Onlar qrupu birinci pillədə başa vuracaq. Buna şübhə yoxdur. San Marino bizə hədiyyə rəqibdir. Yəni, onlara hörmət edirik. Lakin hər iki görüşdə uğur qazanmaq olar. Mümkün olmayacaqsa, daha niyə məşq edirik? Norveçlə yaxınlarda oynadıq. Səfərdə heç-heçəyə nail olduq. Şimali İrlandiya bizə tanış rəqibdir. Fiziki göstəriciləri yüksək olan komandadır. Çexiya ilə heç vaxt oynamamışıq. Almaniyadan başqa digər komandalara müqavimət göstərmək lazımdır. Bizim buna gücümüz çatacaq. Püşk millimizə qarşı səxavətli olub. İndi o zaman yığma hansı vəziyyətdə olacaq, onu demək çətindir".
Məşqçilər Şurasının üzvü bildirir ki, DÇ-2018-in seçmə mərhələsində Azərbaycan millisi pley-offa vəsiqə uğrunda oynaya bilər: "İlk olaraq yada salaq ki, hazırda Prosineçki futbolumuzu və millimizi öyrənir. Gələn seçmə mərhələdə artıq nəticə lazım olacaq. Bu rəqiblərlə qrupda üçüncü yerə oynamaq olar. Əlbəttə, bir qədər daha yaxşı hazırlaşsaq, pley-off haqda düşünə bilərik. Çünki, belə rəqiblər bizə daha heç vaxt nəsib olmayacaq. Rəqiblər zəif deyil, amma mundialın seçmə mərhələsində belə komandalarla oynamağı normal qarşılamaq lazımdır. Hamısı San Marino ola bilməz. Üçüncü yerə layiqli namizəd sayılmalıyıq. Hər il xal sayını artırmaq inkişaf demək deyil. Qrupda konkret yer tutmaq gərəkdir. Nə vaxta qədər hər seçmə mərhələdə 2 xal artıracayıq və bunu nəticə hesab edəcəyik?"
Futbolçuların hazırlığına gəlincə, Hacıyev hazırda yerli futbolçularla bağlı böyük seçim olmadığını etiraf edir. Onun sözlərinə görə yeni seçmə mərhələ üçün indidən seleksiya işləri aparılmalıdır: "Yeni seçmə mərhələ bizim üçün yeni çağırışdır. Hər il yeni ümidlərimiz olur. Fikrimcə, püşk bizə normal komandalar qismət edib. Hər səbətdən bizə münasib rəqiblərdir. Xal sayında rekord etməklə yanaşı qrupda konkret hədəfimiz olmalıdır. Millimizə uğur diləyirəm və inanıram ki, qarşıya qoyulan məqsədə çatacaq. Millimizin vəziyyəti və hədəflər barədə Prosineçki danışda daha düzgün olar".