Bədavi Hüseynov: Qarabağ Rudarla oyuna qədər tam hazır olacaq
"Qarabağ"ın müdafiəçisi Bədavi Hüseynovun azerisport.az saytına müsahibəsi
- Avstriya toplanışı necə keçir?
- Hər şey normaldır. Məşqlərimiz ağır olur. Amma biz bunu başa düşürük. Çünki qarşıda bizi Çempionlar Liqası gözləyir və buna çox ciddi hazırlaşmalıyıq.
- Avstriyanın "Horn" (3:4) və Rumıniyanın "Styaua" (2:3) klubları ilə yoxlama oyunlarınızda məğlubiyyətlə üzləşdiniz...
- İlk oyunlar həmişə çətin keçir. Zamanla hər şey düzələcək. Futbolçular arasında anlaşma səviyyəsi artıq yaxşılaşıb. "Horn" və "Styaua" ilə oyunlar maraqlı alındı. Amma bizim üçün bu görüşlərdə nəticə önəm kəsb etmirdi. Əsas vəzifə baş məşqçinin tapşırıqlarını yerinə yetirmək idi.
- İki oyuna yeddi qol buraxmısınız. Problem nədədir?
- Futbolçular toplanış zamanı adətən ağır fiziki məşqlər edirlər. Bu, oyunlarımızın nəticəsinə təsirsiz ötüşməyə bilməzdi. Amma zaman keçdikcə bu problem də aradan qalxacaq.
- Yeni futbolçularınızın uyğunlaşması necə keçir?
- Hamısı yaxşı uşaqlardır. Artıq yeni futbolçularla ümumi dil tapa bilmişik. Onların çoxunu Azərbaycan çempionatından tanıyırdım. Bir sözlə, bu baxımdan problem yoxdur.
- Mərakeşli Alharbi El-Jadeuyi barədə nə fikirdəsiniz?
- Yaxşı insandır. Sol cinahda yaxşı təsir bağışlayrı, driblinqləri pis deyil. O, hələ "Qarabağ"ın oyun üslubuna uyğunlaşmağa çalışır. Ümid edirəm ki, komandamıza faydalı olacaq.
- O, Leroy Corcu əvəzləyə biləcək?
- Baş məşqçi onun transferini özü istəyibsə, deməli, mərakeşli Leroyu əvəzləyə biləcək.
- Moskva "Lokomotiv"i ilə oyundan nə gözləyirsiniz?
- "Lokomotiv" güclü komandadır. Baş məşqçinin tapşırıqlarını yerinə yetirməyə çalışacağıq.
- "Qarabağ" "Rudar"la matça hazırdır?
- Bizim hələ hazırlaşmaq üçün vaxtımız var. Müəyyən taktiki gedişlər üzərində çalışacağıq. İlk oyun gününə qədər tam hazır olmalıyıq.