Əsgər Abdullayev: Hər üç təmsilçimiz Avroliqada mərhələ adlaya bilər
Azərbaycan yığmasının sabiq baş məşqçisi Əsgər Abdullayevin azerisport.az saytına müsahibəsi
- Avropa Liqasındakı təmsilçilərimizdən hansının oyununa baxa bildiniz?
- "Neftçi" ilə "Qəbələ"nin oyununa baxdığımı deyə bilərəm.
- Hansının oyunu xoşunuza gəldi?
- Düzünü desəm, bakılılar daha motivasiyalı təsir bağışlayırdılar. Amma təcrübə çatışmazlığı bu komandanı məyus etdi. Buna baxmayaraq, "Neftçi" qələbəyə yaxın idi. Sadəcə, səhvlər buna mane oldu.
- Sizə elə gəlmir ki, Çernoqoriya "Mladost"u elə də güclü rəqib deyildi?
- Bu, birinci təsnifat mərhələsinin ilk oyunu idi. Rəqiblərdən yüksək səviyyəli oyun gözləməyə dəyməz. Amma çernoqoriyalılarla nisbətdə "Neftçi" daha yaxşı təsir bağışladı.
- Bu heç-heçədən sonra "ağ-qaralar"ın şansları necədir?
- İlk oyunu buraxan təcrübəli futbolçular cavab matçında sıraya dönsə, "Mladost"u səfərdə məğlub etmək olar. Bu, "Neftçi"nin keçməli olduğu komandadır. Hətta bütün problemlərə rəğmən. Bu klubun yetirməsi olaraq "Neftçi"ni ikinci təsnifat mərhələsində görməyi çox istərdim.
- Gürcüstanda "Dinamo"ya uduzan "Qəbələ" sizi də məyus etdi?
- Hələ oyundan öncə də Tiflis klubunun böyük ənənələrə sahib olduğunu söyləmişdim. Onlar topla oynamağı sevirlər. "Qəbələ" topu onlara verməklə səhvə yol verdi. Onları topsuz saxlamaq lazım idi. Rəqibin çoxlu boşluqları olsa da, bundan yararlana bilmədilər.
- Rəqibin hətta azlıqda qalması da "Qəbələ"yə kömək etmədi...
- "Qəbələ"nin yenə də yaxşı şansı var. Ev oyununda hətta bir qol da bu komandanı növbəti mərhələyə çıxaracaq. Şanslar 70-in 30-a "Qəbələ"nin xeyrinədir. Ümumiyyətlə, hər üç klubumuz Avroliqanın ikinci təsnifat mərhələsinə yüksələ bilər.
- Amma Avroliqa ərəfəsində "İnter"ə inanan çox az idi...
- Bəli, əksəriyyət elə düşünürdü. Amma Albaniya "Laçi"si ilə səfər heç-heçəsi təmsilçimizə növbəti mərhələyə adlamaq üçün yaxşı şans yaradır. Hətta deyərdim ki, digər klublarımızla müqayisədə ən yaxşı şansa malik olan elə "İnter"dir. Doğma meydanda "Laçi"yə qalib gəlmək olar və qalib gəlmək lazımdır.