Georgi Nikolov: Albaniyaya ona görə getmədim ki, klubun burdakı problemlərini yoluna qoyum
"İnter"in prezidenti Georgi Nikolovun azerisport.az saytına müsahibəsi
- Avropa Liqasının birinci təsnifat mərhələsi çərçivəsində Albaniyanın "Laçi" klubu ilə səfər oyununuz 1:1 hesabıyla başa çatdı. Nəticədən razı qaldınız?
- Razıyam. Amma daha yaxşı nəticəyə nail ola bilərdik.
- "İnter"in sərgilədiyi oyunla bağlı nə deyə bilərsiniz?
- Stadionda deyildim. Oyunu Bakıdan izlədim. Bu, komandamın ən yaxşı oyunu deyildi. Amma nəzərə almaq lazımdır ki, komanda gec toplandı, futbolçular arasındakı anlaşma səviyyəsi istənilən kimi deyil. Nəticə isə oyuna görə oldu. Çox istərdim ki, cütün taleyi elə Albaniyadakı oyunda həll olunsun. Bakıda ehtiyatlı oynamalıyıq ki, növbəti mərhələyə vəsiqə qazanaq.
- "Laçi"nin baş məşqçisi iddia edib ki, "İnter" cərimə zərbəsindən vurulan qoldan başqa heç nə ilə yadda qalmadı...
- Mən Albaniya klubunun ifasında aqressivlikdən başqa xüsusi bir şey görmədim. Onlar bütün meydan boyu pressinq tətbiq edirdilər. Amma bizim müdafiə xəttimiz səliqəli çıxış etdi və rəqibə çox şans vermədi. Rəqib iki dəfə müdafiə xəttimizi ciddi şəkildə narahat etdi, onlardan da biri qolla nəticələndi.
- "İnter" bu komandanı mübarizədən kənarlaşdıra biləcək?
- Mən buna inanıram. Səfərdəki heç-heçədən yararlanmaq lazımdır. Üstünlüyümüzü qorumalıyıq. Mərhələ adlayacağımıza ümidliyəm.
- Klub prezidenti niyə Albaniyada, komandasının yanında deyildi?
- Bakıda vacib işlərimiz vardı. Burada qaldım ki, klubun mövcud problemlərini həll edim.
- İşləriniz hazırda nə yerdədir? Mətbuatda belə bir informasiya yayılıb ki, həm "İnter"ə, həm də "Simurq"a maliyyə yardımı göstəriləcək...
- Biz futbolun inkişafına dair yeni dövlət proqramının təsdiqlənməsini gözləyirik. Həmin proqramda klubların gələcək inkişafı üçün məsələlər də yer alacaq. Amma hazırda bu yöndə işlərin nə yerdə olduğundan xəbərim yoxdur.
- Deməli, hər şey əvvəlki kimi qaranlır qalır?
- Ümid edirəm ki, hər şey yaxşı olacaq. Həmişə belə qala bilməz. Gec-tez bizim problemlərimiz də həllini tapmalıdır.