Mladostun futbolçuları polisə tüpürdülər, mətbuat konfransı baş tutmadı
Avropa Liqasının birinci təsnifat mərhələsi çərçivəsində "Neftçi"nin rəqibi olan Çernoqoriya "Mladost"unun baş məşqçisi Aleksandr Nedoviçin bu gün Bakıda mətbuat konfransı baş tutmalıydı. Azerisport.az xəbər verir ki, tədbirin saat 20:30-da start götürməliydi.
Amma mətbuat konfransı keçirilməyib. Buna çernoqoriyalıların "Bakcell Arena"ya gec gəlməsi səbəb olub. Ona görə də mətbuat konfransı ləğv olunub.
Sonradan məlum olub ki, "Mladost"un stadiona gec gəlməsinə səbəb onları aparan avtobusu müşaiyət edən yol polisləri olub. Belə ki, onlar "Bakcell Arena"nın yolunu tapa bilmirmiş. Stadiona təxminən bir saat gec gələn çernoqoriyalı futbolçular avtobusdan düşərkən öz narazılıqlarını aşkar biruzə veriblər. Rəqib oyunçulardan mədəniyyətsizlik nümayiş etdiyib, polislər tərəfə tüpürənlər də olub. İstisna deyil ki, Çernoqoriya klubunun nümayəndələri sadəcə, yerli mətbuatla ünsiyyət qurmaq istəmirmiş.
Qeyd edək ki, "Mladost" sabah "Bakcell Arena"da "Neftçi"nin qonağı olacaq. Matç saat 21:00-da start götürəcək.
