Rikardinyo: Biz Qəbələnin tarixində yeni səhifə yazmaq istəyirik
"Qəbələ"nin müdafiəçisi Rikardinyonun azerisport.az saytına müsahibəsi
- Avropa Liqasının birinci təsnifat mərhələsində qarşılaşacağınız Tiflis "Dinamo"su (Gürcüstan) ilə ilk oyuna necə hazırlaşmısınız?
- Hazırlığa başladığımız dövrdən etibarən yaxşı tempdə məşq etdik. Fikrimcə, hazırlıq yüksək səviyyədə keçdi. Məşqçilər korpusu bizdən razı qaldı. Amma bizim qarşıdakı oyunlara nə dərəcədə hazır olduğumuzu həmin görüşlər göstərəcək.
- "Qəbələ"də mövsümlərarası fasilədə çoxlu dəyişikliyin baş verməsi problem yaratmayacaq?
- Yeni futbolçularımız kifayət qədər səviyyəlidirlər. Sadəcə, bizə müəyyən vaxt lazımdır ki, yeni gələnlərin hər biri oyun üslubumuza tam alışsınlar.
- "Dinamo" barədə nə bilirsiniz?
- Etiraf edim ki, "Dinamo" barədə elə də çox məlumatım yoxdur. Bilirəm ki, çox təhlükəli və güclü komandadır. Xüsusilə də öz meydanlarında oynayanda. Klubun böyük tarixi var.
- Gürcülərin öz meydanında təhlükəli olduğunu nəzərə alsaq, Tilfisdəki oyundan nə gözləyək?
- Biz hər şeyə hazır olmalıyıq. Amma təbii ki, məğlubiyyət bizi qane etməyəcək. Toplanış dövründəki hazırlığımızı oyunda göstərməliyik.
- Şanslar barədə nə deyə bilərsiniz?
- Bu barədə sizə hələ nəsə deyə bilmərəm. Amma ümid edirəm ki, Avroliqanın bu mövsümündəki çıxışımız "Dinamo"ya qarşı keçirəcəyimiz oyunlarla məhdudlaşmayacaq.
- "Qəbələ" bu komanda ilə oyunlarda avrokuboklardakı ilk qolunu vura, ilk xalını və qələbəsini qazana bilər...
- Komandamız ilk dəfə avrokuboklarda ötən mövsüm çıxış etdiyini bilirdim. Amma qol vurmadığından xəbərsiz idim. İndi bunun elə də önəmi yoxdur. Biz klub tarixində yeni səhifə yazmaq istəyirik. Yeni komandamız var. Keçmişlə yox, gələcəklə yaşamaq lazımdır. Əminəm ki, bu gələcək parlaq olacaq.