Məhəmməd Mirzəbəyov: Biz Dinamoya həm səfərdə, həm də evdə qalib gələ bilərik
"Qəbələ"nin müdafiəçisi Məhəmməd Mirzəbəyovun azerisport.az saytına müsahibəsi
- "İnter"ə qarşı keçirdiyiniz son yoxlama oyunu barədə nə deyə bilərsiniz?
- Asan oyun olmadı. Topu özümüzdə saxlamaq yaxşı alındı. Baş məşqçinin bütün tapşırıqlarını yerinə yetirməyə çalışdıq.
- Tiflis "Dinamo"su ilə oyuna bir neçə gün qalıb. "Qəbələ" Gürcüstan klubu ilə duelə hazırdır?
- Bizə istədiyimiz futbolu sərgiləmək üçün bir qədər də vaxt lazımdır. Amma müəyyən şeylər artıq bizdə alınır. Futbolçular arasındakı anlaşma səviyyəsi yaxşılaşıb.
- "Qəbələ"yə yeni gəlmisiniz. Əsas heyətə düşmək uğrunda rəqabətdən qalib çıxdığınızı demək olar?
- Hələ bu barədə danışmaq tezdir. Belə qısa müddət ərzində rəqabəti necə qazanmaq olar? Komandada Roman Qriqorçukun rəhbərliyi altında daha uzun müddət oynayan futbolçular var. "İnter"də oynadığımız futbol fəlsəfəsi tam fərqli idi. "Qəbələ"nin fərqli oyun üslubuna alışmaq üçün də vaxt lazımdır.
- Avropa Liqasından nə gözləyirsiniz?
- Hələ "Dinamo" barədə heç nə bilmirəm. Onların oyunlarına baxacağıq. "İnter"də olarkən Gürcüstan klublarına qarşı oynamışdım. Amma "Dinamo"ya qarşı yox.
- Özünüz necə klub olması ilə maraqlanmısınız?
- Prinsipcə, bu komandanı tanıyırıq. Amma hazırda necə futbol oynadıqlarını bilmirik. Onu da tezliklə biləcəyik.
- Sizi kifayət qədər gənclərdən təşkil olunmuş döyüşkən bir komanda gözləyir. Onları keçə biləcəksiniz?
- Bunu eşitmişəm. Amma istənilən halda bir komanda Avropa Liqasında oynamaq hüququ qazanıbsa, onunla mübarizə aparmaq asan ola bilməz.
- İlk oyunda sizdən hansı nəticəni gözləyək?
- Ən yaxşı nəticə qələbədir.
- Amma ilk matç Tiflisdə olacaq...
- Qələbəni burada da qazanmaq olar, orada da.