Arqend Mustafa: İnterin Laçi ilə oyunlarda üstünlüyü var
Albaniyanın "Laçi" klubunun yarımmüdafiəçisi Arqend Mustafanın azerisport.az saytına müsahibəsi
- Avropa Liqasının birinci təsnifat mərhələsinin püşkünün sizə "İnter"i çıxarmasını necə qarşıladınız?
- Sakit qəbul etdim.
- Deməli, bu komndanı asanlıqla keçəcəyinizi düşünürsünüz?
- Xeyr, təbii ki, elə düşünmürük. Bilirik ki, bizi çox çətin oyunlar gözləyir.
- Bakı klubu barədə məlumatınız var? Komanda yoldaşınız Elton Doku saytımıza bildirmişdi ki, o, Bakı "İnter"ini yox, Milan "İnter"ini tanıyır...
- Mən "İnter" barədə eşitmişdim, bilirdim ki, Azərbaycanın da belə bir təmsilçisi var. Paytaxt təmsilçisi olmasından da xəbərim vardı. Həmçinin onu da bilirəm ki, bizdən fərqli bu komandanın avrokuboklarda böyük təcrübəsi var. Bu, onlara az kömək etməyəcək.
- İlk matçı evdə keçirməyiniz üstünlükdür?
- Xeyr, ilk matçın Albaniyada keçirilməsini özümüz üçün üstünlük hesab etmirəm. Çünki əsas birinci oyun yox, cavab matçıdır. Hər şeyi də olmasa, çox şeyi cavab matçı həll edir. Belə olan vəziyyətdə azarkeşlərin dəstəyi də böyük önəm kəsb edir. Çox istərdik ki, ilk oyun Bakıda keçirilsin.
- Komandaların şansları barədə nə deyə bilərsiniz?
- Əllinin əlliyə. Sadəcə, "İnter"in avrokuboklarda daha böyük təcrübəyə malik olması, cavab matçını Bakıda keçirməsi onlara üstünlük qazandırır. İstənilən halda sonadək mübarizə aparacağıq. Bizim artıq Azərbaycan təmsilçisini mübarizədən kənarlaşdıran komandamız olub.
- "Neftçi"yə qalib gəlmiş "Şkenderbeu"nu nəzərdə tutursunuz?
- Bəli. Cavab oyunu Albaniyada keçirilirdi. Həmin oyun xatirimdədir. Fikrimcə, biz də "İnter"i keçə bilərik. Çünki yaxşı komandamız var.
