Elşad Quliyev: Komandam yarımfinala qədər irəliləyəcək gücdədir
Azərbaycanın çimərlik futbolu üzrə "Amrahbank" klubunun baş məşqçisi Elşad Quliyev İtaliyada keçiriləcək EuroWinnersCup turniri öncəsi fikirlərini açıqlayıb. Azerisport.az saytına müsahibəsində o, eyni qrupda yer aldıqları "Lokomotiv" (Rusiya), "Monpelye" (Fransa) və "Konstanta" (Rumıniya) ilə görüşlərdəki şanslarından danışıb.
- Komandanız qarşıdakı turnirə nə dərəcədə hazırdır?
- Komandanın 80 faizi Azərbaycan yığmasının üzvlərindən təşkil olunub. Bakıdakı toplanışımız bir neçə gün öncə başa çatdı. Hazırlıq üçün daha bir neçə gün vaxtımız var. Bu gün İtaliyaya yola düşəcəyik. Qalan hazırlığımızı orada davam etdirəcəyik.
- İtaliyaya hansı ümidlərlə gedirsiniz?
- Çətin qrupa düşmüşük. Amma qrup mərhələsini keçəcəyimizə inanıram.
- Rəhbərlik qarşınıza hansı vəzifəni qoyub?
- "Amrahbank" üçün bu turnir bir ilk olacaq. Reytinqimiz aşağı olduğundan püşkatma zamanı ən zəiflərin yer aldığı dördüncü səbətdə idik. Amma oyunçularımızın beynəlxalq oyun təcrübəsi çoxdur. Qarşımıza qrupdan çıxmaq hədəfi qoyulub. Lakin komandanın yarımfinala qədər irəliləyəcək gücdə olduğunu düşünürəm.
- Qarşıda Avropa Oyunları da var və komandanızın əksər üzvləri orada da çıxış edəcək. Yəqin ki, yığmanın baş məqçisi Ze Migel də İtaliyadakı oyunları izləyəcək...
- Düzünü deyim ki, Ze Migelin planlarından xəbərim yoxdur. Amma onun komandamın oyunlarını izləyəcəyini düşünürəm.
- Bu turniri yığmamız üçün də Avropa Oyunlarına hazırlıq kimi dəyərləndirmək olar?
- Şübhəsiz. Turnir oyunçulara formada qalmağa kömək edəcək. Azərbaycan yığmasının necə çətin qrupa düşdüyünü nəzərə alsaq, İtaliyadakı avrokubok oyunları bu baxımdan çox faydalı olacaq. Avropanın ən yaxşı komandalarına qarşı layiqli mübarizə aparmaq üçün belə klub turnirlərində də uğurlu nəticələrə imza atmaq vacibdir.
- Final oyunu iyunun 7-də baş tutacaq. Ən yaxşı halda həlledici oyuna vəsiqə qazana bilsəniz, millimizin üzvləri Avropa Oyunlarında yorğunluq problemi ilə üzləşməzlər?
- Bakıda iyunun 9-da qayıdacağıq. Avropa Oyunlarında isə çimərlik futbolu üzrə turnir ayın 22-də start götürəcək. İstirahət və hazırlıq üçün iki həftə vaxt olacaq. Ona görə də hansısa problem olacağını düşünmürəm.