Bürünc üçün bir xal yetər
Topaz Premyer Liqasının 2014/15 movsumunə mayın 28-də yekun vurulacaq. Azerisport.az xəbər verir ki, həmin gun Qəbələ şəhər stadionunda “Bakı”nı qəbul edəcək "Qəbələ" tarixində ikinci dəfə Azərbaycan cempionatının bürünc medallarını qazanmağa cox yaxındır. Bunun ucun “qırmızı-qaralar”a 1 xal da kifayətdir.
Ya qələbə, ya da “sülh”
Artıq Avropa Liqasına vəsiqəni təmin edən “Qəbələ” qışda liderlər qrupundan çox geridə qalırdı. Baş məşqçi postuna Roman Qriqorçukun təyin olunmasından sonra bu komanda inanılmazı gerçəkləşdirə bildi. Çempionatda ardıcıl 8 qələbə və 11 məğlubiyyətsiz oyun seriyası medallar uğrunda mübarizəyə yenidən qoşulmağa imkan yaratdı. Finişə doğru isə “Neftçi”ni 3-cü pillədən sıxışdırmaqla, bürünc medal şansı xeyli artdı. Son turda flaqmanın “Bakı” ilə oyunda xal itirməsi (0:0) bölgə klubunun işini bir qədər də asanlaşdırdı. İndi hər şey "Qəbələ"nin öz əlindədir. Mayın 28-də - Respublika günündə “qırmızı-qaralar” bayrama bayram qatmaq əzmindədirlər. Qələbə qazana bilməsələr belə, heç-heçə də bu komanda üçün qaneedici nəticə olacaq. Çünki "Qəbələ" ən yaxın izləyicisini, 4-cü pillənin sahibi “Neftçi”ni 3 xal qabaqlayır.
“Qəbələ”nin futbolçu və məşqçi heyəti son 3-4 ayda fantastik tempdə çalışır. Lakin nə mövsümün finişə çatması, nə də rəqibin autsayder olması arxayınlıq yaratmalıdır. Komandanın məşqçisi Sənan Qurbanov da belə düşünür: “Bakı” ilə oyuna planauyğun hazırlıq keçmişik. Futbolçularımız yaxşı formadadır. Baş məşqçimiz toplantılarda dəfələrlə bildirib ki, son oyunumuz həddən artıq vacibdir. Buna görə iş rejimimiz zəifləməyib, əksinə, güclənib”.
Təqvimə əsasən, 35-ci turda istirahət edən “Qəbələ” yaranmış fasilədən istifadə edərək I divizionun çempionu “Neftçala” ilə yoldaşlıq görüşündə üz-üzə gəlib. S.Qurbanovun sözlərinə görə, 4:0 hesabı ilə qalib gəldikləri həmin yoldaşlıq matçı faydalı olub: “Futbolçular bu matça da tam məsuliyyətlə yanaşdılar. Qarşıya belə vəzifə qoyulmuşdu ki, istədiyimiz oyunu və nəticəni alaq. Bu matçda əsas heyətlə yanaşı, bizə lazım olan futbolçuları da sınaqdan keçirdik. Roman Qriqorqçuk qətiyyətlə deyir ki, mənim komandamda arxayınlıq ola bilməz. Yalnız bir dəfə - “Xəzər Lənkəran”la səfər oyununda belə “boşalma” hiss eləmişdik və bu, hər yığıncaqda ciddi şəkildə qeyd edilirdi”.
"Qəbələ" “Bakı”ya 30 aydır uduzmur
İndiyə qədər “Qəbələ” və “Bakı” komandaları arasında Azərbaycan çempionatlarında 27 görüş keçirilib. Həmin oyunların 9-da qalib gələn "Qəbələ" 12 dəfə məğlubiyyətə üzülüb. Heç-heçə bitən oyunların sayı 6-ya bərabərdir. Eyni zamanda topların nisbətində cüzi fərq var - 27:29. Əlahəzrət statistika son zamanlar “Qəbələ”nin tərəfindədir. Bu komanda paytaxtın eyniadlı klubuna ilk “duel”lərdə daha çox məğlub olub. Ancaq zaman keçdikcə püxtələşən “qırmızı-qaralar” oyundan-oyuna balansı yaxşılaşdırır, fərqi aradan götürür. “Qəbələ” axırıncı dəfə “Bakı”ya, təxminən, 30 ay öncə uduzub (2 dekabr 2012-ci il, 0:2). O vaxtdan bəri baş tutan 9 qarşılaşmanın 6-da bölgə təmsilçisi rəqibinə məğlubiyyət acısı daddırıb.
Sonda daha bir məqama diqqət yetirək: Roman Qriqorçuk yeni vəzifəsində ilk qələbəsini məhz “Bakı” üzərində qazanıb. Söhbət bu il fevralın 1-də Premyer Liqanın XIX turunda paytaxtda əldə etdiyi 2:0 hesablı zəfərdən gedir. Tale elə gətirib ki, ukraynalı mütəxəssis Azərbaycandakı işinə “Bakı” ilə başladığı kimi, cari mövsümü də elə “Bakı” ilə bitirməli olur. Deməli, çempionatı major notda başa vurmaq üçün ələ yaxşı imkan düşüb. ("Qəbələ İK")